Monsha-aialdama! Astanada biýdjettiń milliondary jumsalǵan maqtaýly aialdamalar jurtty aptan ystyqtan qorǵai almady. Óitkeni, jarnamasy jer jarǵan qymbat pavilondarda konditsioner atymen joq. Sondyqtan qainaǵan aialdamany jolaýshylar «monsha» dep atap ketken. Astanalyqtardy esten tandyrǵan shildeniń shilińgir ystyǵy jaily KTK telearnasy habarlady.
Dalada +32 gradýs, al bul aialdamanyń ishinde synap baǵanasy +35 gradýsty kórsetip tur. Múldem aýa joq. Qapyryq. Sondyqtan ystyqqa shydamai basy ainalǵan adamdar avtobýsyn syrtta kútýge májbúr.
Ysqaq Mákeshov, Astana qalasynyń turǵyny:
-Estigenbiz qymbat ekenin aialdamanyń . Esik ashyq tur ǵoi. Esik jabylyp qalsa otyrý múmkin emes otyrý. «Monsha –parilka» bop ketedi.
Osy «monshada» Ysqaq Mákeshov te uzaq otyra almady. Bir qyzyǵy, Astananyń burynǵy ákimi Ádilbek Jaqsybekov maqtaýly nysanda jazda konditsioner bolady dep sendirgen. Áitse de, jospar aiaq-asty ózgerip salqyndatqysh endi jańadan turǵyzylatyn aialdamalarǵa ornatylmaqshy eken. Bul sharýa úshin biýdjetten taǵy qarjy bólinip qoiǵan.
-Al byltyr salynǵan pavilondardyń jylytatyn peshi, interneti, kamerasy bolǵanymen, konditsionerge aqsha jetpei qalǵanǵa uqsaidy. Elorda ákimdigi salqyndatqysh jobada múldem qarastyrylmaǵan, tek jeldetkish qoiylǵan dep aqtalyp otyr. Biraq onysy da istep turǵan joq.
Jalpy, jolaýshylardy Astananyń aq tútek boranynan qorǵaidy delingen bul aialdamanyń basynan daý arylmai-aq qoidy. Alǵashqy aiazǵa shydamai esigi synyp, elektrondy taqtaishasy isten shyqqan. Al mundai aialdamanyń baǵasy arzan emes. Sheneýnikter onyń árqaisysyna biýdjettiń 10 million teńgesin jumsaǵan. Osy kezde,Reseidiń Krasnoiar qalasynda dál osyndai aialdamanyń quny 3 ese arzanǵa salynypty.
Shyjyǵan ystyqtan esi shyqqan elordalyqtar qazir bala-shaǵasymen sýburqaq sýyna shomylyp júr. Osylaisha, shaqyraiǵan kúnniń qyzýynan árkim óz betinshe qorǵanyp álek. Tek qan qysymy bar turǵyndar úiinde qamalyp otyrýǵa májbúr.
