مونشا-ايالداما! استانادا بيۋدجەتتٸڭ ميلليوندارى جۇمسالعان ماقتاۋلى ايالدامالار جۇرتتى اپتان ىستىقتان قورعاي المادى. ٶيتكەنٸ, جارناماسى جەر جارعان قىمبات پاۆيلونداردا كونديتسيونەر اتىمەن جوق. سوندىقتان قايناعان ايالدامانى جولاۋشىلار «مونشا» دەپ اتاپ كەتكەن. استانالىقتاردى ەستەن تاندىرعان شٸلدەنٸڭ شٸلٸڭگٸر ىستىعى جايلى كتك تەلەارناسى حابارلادى.
دالادا +32 گرادۋس, ال بۇل ايالدامانىڭ ٸشٸندە سىناپ باعاناسى +35 گرادۋستى كٶرسەتٸپ تۇر. مٷلدەم اۋا جوق. قاپىرىق. سوندىقتان ىستىققا شىداماي باسى اينالعان ادامدار اۆتوبۋسىن سىرتتا كٷتۋگە مەجبٷر.
ىسقاق مەكەشوۆ, استانا قالاسىنىڭ تۇرعىنى:
-ەستٸگەنبٸز قىمبات ەكەنٸن ايالدامانىڭ . ەسٸك اشىق تۇر عوي. ەسٸك جابىلىپ قالسا وتىرۋ مٷمكٸن ەمەس وتىرۋ. «مونشا –پاريلكا» بوپ كەتەدٸ.
وسى «مونشادا» ىسقاق مەكەشوۆ تە ۇزاق وتىرا المادى. بٸر قىزىعى, استانانىڭ بۇرىنعى ەكٸمٸ ەدٸلبەك جاقسىبەكوۆ ماقتاۋلى نىساندا جازدا كونديتسيونەر بولادى دەپ سەندٸرگەن. ەيتسە دە, جوسپار اياق-استى ٶزگەرٸپ سالقىنداتقىش ەندٸ جاڭادان تۇرعىزىلاتىن ايالدامالارعا ورناتىلماقشى ەكەن. بۇل شارۋا ٷشٸن بيۋدجەتتەن تاعى قارجى بٶلٸنٸپ قويعان.
-ال بىلتىر سالىنعان پاۆيلونداردىڭ جىلىتاتىن پەشٸ, ينتەرنەتٸ, كامەراسى بولعانىمەن, كونديتسيونەرگە اقشا جەتپەي قالعانعا ۇقسايدى. ەلوردا ەكٸمدٸگٸ سالقىنداتقىش جوبادا مٷلدەم قاراستىرىلماعان, تەك جەلدەتكٸش قويىلعان دەپ اقتالىپ وتىر. بٸراق ونىسى دا ٸستەپ تۇرعان جوق.
جالپى, جولاۋشىلاردى استانانىڭ اق تٷتەك بورانىنان قورعايدى دەلٸنگەن بۇل ايالدامانىڭ باسىنان داۋ ارىلماي-اق قويدى. العاشقى ايازعا شىداماي ەسٸگٸ سىنىپ, ەلەكتروندى تاقتايشاسى ٸستەن شىققان. ال مۇنداي ايالدامانىڭ باعاسى ارزان ەمەس. شەنەۋنٸكتەر ونىڭ ەرقايسىسىنا بيۋدجەتتٸڭ 10 ميلليون تەڭگەسٸن جۇمساعان. وسى كەزدە,رەسەيدٸڭ كراسنويار قالاسىندا دەل وسىنداي ايالدامانىڭ قۇنى 3 ەسە ارزانعا سالىنىپتى.
شىجىعان ىستىقتان ەسٸ شىققان ەلوردالىقتار قازٸر بالا-شاعاسىمەن سۋبۇرقاق سۋىنا شومىلىپ جٷر. وسىلايشا, شاقىرايعان كٷننٸڭ قىزۋىنان ەركٸم ٶز بەتٸنشە قورعانىپ ەلەك. تەك قان قىسىمى بار تۇرعىندار ٷيٸندە قامالىپ وتىرۋعا مەجبٷر.
