"Qazaqstannyń Damý Banki" AQ Joǵary aýditorlyq palatanyń ózderine qatysty taratqan aqparatqa qatysty túsinikteme berdi, dep habarlaidy Dalanews.kz.
"QDB tarapynan baǵdarlamalar aiasynda usynylatyn mólsherlemeler ýákiletti memlekettik organdar bekitken qarjylyq-ekonomikalyq negizdemelerdiń parametrlerine qatań sáikes keledi. Baǵdarlama ákimshileri – salalyq ministrlikter syiaqynyń shekti eń joǵary mólsherlemelerin belgileidi. Biýdjettik ótinimdi qalyptastyrý kezinde syiaqynyń shekti eń joǵary mólsherlemelerin esepteý tartylatyn naryqtyq jáne biýdjettik qaryz qarajattarynyń úlesi men ortasha ólshengen kredittik reiting negizinde júzege asyrylady", delingen QDB baspasóz qyzmetiniń habarlamasynda.
Sondai-aq syiaqy mólsherlemesin aiqyndaý úshin QDB táýekelderdi basqarýdyń halyqaralyq tásilderin, onyń ishinde Standard & Poor 's, Moody' s jáne Fitch siiaqty jetekshi álemdik agenttikterdiń júielerine sáikes keletin kredittik reitingter shkalasyn qoldanatynyn da naqtylaidy.
"Osyǵan bailanysty syiaqy mólsherlemeleriniń memlekettik baǵdarlamalardyń sharttaryna sáikessizdigi bóliginde bankke qatysty buzýshylyqtar Joǵarǵy aýditorlyq palata tarapynan anyqtalǵan joq. Bank memlekettik baǵdarlamalardyń operatory retinde biýdjetten árbir 1 teńgege (0,15%) biýdjetten tys kózderden – ishki nemese halyqaralyq kapital naryqtarynan (16%-dan astam) keminde 1 teńge tartady. Máselen, 2024 jyldyń qorytyndysy boiynsha bul proportsiia aitarlyqtai artty: biýdjet qarajatynyń árbir 1 teńgesine naryqtan tartylǵan 3 teńge sáikes keldi. Tiisinshe, bul baǵdarlamalar boiynsha banktiń ortasha qorlandyrý quny biýdjetten tartylatyn qarajat mólsherinen (5-6%) edáýir joǵary", - deidi QDB.
Bul rette bank memlekettik damý institýty retinde paida tabýdy maqsat etpeidi. Onyń qyzmeti qaitarymdylyq, jedeldik jáne qamtamasyz etýshilik printsipterine negizdelgeni de basa aitylady.
"Bul degenimiz – qaryz alýshyǵa berilgen árbir teńge belgilengen merzimde, tartylǵan qarajat pen operatsiialyq shyǵyndardy jabýǵa jetkilikti eń tómengi syiaqy mólsherlemesimen qaitarylýy tiis. Budan bólek, bank jyl saiyn taza paidasyn dividendter men salyqtar túrinde respýblikalyq biýdjetke aýdarady. Sonymen qatar, Joǵarǵy aýditorlyq palata júrgizgen aýdittiń nátijeleri boiynsha, bank syiaqy mólsherlemelerin birizdendirý maqsatynda ishki qujattaryna ózgerister engizý boiynsha jumystar júrgizdi", dep naqtylaidy damý institýty.
Bank óz qyzmetiniń ashyqtyǵy men transparenttiligin qamtamasyz etý jónindegi jumysty turaqty negizde jalǵastyrady jáne memlekettik organdarmen, BAQ-pen jáne qoǵammen syndarly dialog úshin ashyq.
Aita ketsek, kúni keshe Joǵary aýditorlyq palata Qazaqstan Damý bankiniń jekelegen qaryz alýshylary salalyq damý tujyrymdamasynda bekitilgen shekti mánderden tómen mólsherlemeler boiynsha kreditter alǵanyn, sondai-aq bank biýdjet qarajatyn 0,15% mólsherlememen alyp, keiinnen qaryz alýshylarǵa ony 9-11% mólsherleme boiynsha kredit retinde bergenin anyqtaǵandaryn habarlaǵan.
QDB shikizattyq emes salalardaǵy jeke investitsiialyq jobalardy, sondai-aq memlekettik infraqurylymdyq jobalardy qarjylandyrýmen ainalysady. Onyń jalǵyz aktsioneri - ekonomika ministrligine qarasty "Báiterek" holdingi. QDB-nyń ózi, Forbes málimetteri boiynsha, Ónerkásipti damytý qoryna jáne gollandiialyq DBK Capital Structure Fund B. V-ge ielik etedi.
