Memleket basshysy «Táýelsizdik bárinen qymbat» maqalasynda «Naýryz meiramyn atap ótý tujyrymdamasyn jasap, kóktem merekesiniń mazmunyn baiyta túsken jón. Búkil qoǵamdy uiystyratyn qundylyqtar neǵurlym kóp bolsa, birligimiz de soǵurlym bekem bolady» dep atap ótken bolatyn.
Osyǵan sáikes, QR Mádeniet jáne sport ministrligi ótken jyly Naýryz meiramyn merekeleýdiń jańa tujyrymdamasyn ázirlep, kópshilikke usyndy.
Jańa tujyrymdamany qamtyǵan is-sharada qazaqstandyq tanymal sýretshiler men qolóner sheberleriniń, ýniversitet fotograf-oqytýshylary men stýdentteriniń kórmesi uiymdastyryldy.
Oqý ornynyń Basqarma Tóraǵasy – Rektory Janseiit Túimebaev jiylǵandardy merekelik shara baǵdarlamasymen tanystyryp, jańa formattyń halyqty biriktirýdegi mańyzyna toqtaldy.
«Naýryz-Art» dep atalǵan sharada tanymal sýretshiler men oqytýshy-stýdentterdiń týyndylary jurtshylyq nazaryna tartý etildi.
QR Kórkemsýret akademiiasynyń prezidenti, Memlekettik syilyǵynyń laýreaty Amandos Aqanaev óz sózinde osyndai igi-sharalardyń jastar boiyndaǵy rýhani qundylyqtardy qalyptastyryp, mádeni tanymyn tolyqtyraryna senim bildirdi.
Onnan asa fakýltet oqytýshylary men jiyrmaǵa jýyq stýdentterdiń áýesqoi eńbekteri kópshiliktiń qyzyǵýshylyǵyn týdyryp, joǵary baǵaǵa ie boldy.
Barlyq týyndylar Naýryz tujyrymdamasyndaǵy «Kórisý kúni», «Jailaý kúni», «Shejire kúni», «Tarihqa taǵzym kúni», «Igi ister kúni», «Shymyrlyq pen sheberlik kúni», «Ziiatkerlik kúni», «Ulttyq taǵamdar kúni», «Ulystyń uly kúni», «Joralǵy kúnin» negizdep, dástúrli qundylyqtardy dáripteýge arnaldy.
Ulystyń uly kúnin tamashalaýǵa Túrkitildes elder Parlamenttik Assambleiasy jáne sheteldik diplomatiialyq korpýs ókilderi men konsýldar da arnaiy kelip, meimandar merekelik baǵdarlamamen tanysyp, Naýryz meiramynyń álem elderinde toilaný dástúrine erekshe nazar aýdardy. Sonymen qatar ýniversitette «Sheberler aýyly» boi kóterdi. Kórme aǵash buiymdar, ulttyq aspap sheberleri, qysh-qumyra, áshekei buiym zergerleri, ismerler men toqymashylar qolynan shyqqan sándik-qoldanbalary týyndylarmen erekshelendi.
«Qaskeleń» mádeniet kolledjiniń oqytýshylary men stýdentteri dombyra, qobyz, sherter aspaptary, qymyz keseler men astaýlar, quraq kórpe, keste, sandyq jáne basqa da turmystyq zattardyń jasalýy boiynsha sheberlik dáris ótkizdi.
Arnaiy tigilgen kiiz úiler men shatyrlarda kópshilikke naýryz kóje, baýyrsaq, palaý taratylyp, tusaýkeser, bata berý siiaqty ulttyq salt-dástúrler kórsetilip, qazaqsha kúres, toǵyz qumalaq, doiby, qol kúres jáne basqa sporttyq oiyndar tartý etildi.
Naýryz merekesi oqytýshy-stýdentterdiń qatysýymen barlyq jataqhanada atap ótildi.
Ál-Farabi atyndaǵy QazUÝ-dyń Baspasóz qyzmeti
