مەملەكەت باسشىسى «تاۋەلسىزدىك بارىنەن قىمبات» ماقالاسىندا «ناۋرىز مەيرامىن اتاپ ءوتۋ تۇجىرىمداماسىن جاساپ، كوكتەم مەرەكەسىنىڭ مازمۇنىن بايىتا تۇسكەن ءجون. بۇكىل قوعامدى ۇيىستىراتىن قۇندىلىقتار نەعۇرلىم كوپ بولسا، بىرلىگىمىز دە سوعۇرلىم بەكەم بولادى» دەپ اتاپ وتكەن بولاتىن.
وسىعان سايكەس، ق ر مادەنيەت جانە سپورت مينيسترلىگى وتكەن جىلى ناۋرىز مەيرامىن مەرەكەلەۋدىڭ جاڭا تۇجىرىمداماسىن ازىرلەپ، كوپشىلىككە ۇسىندى.
جاڭا تۇجىرىمدامانى قامتىعان ءىس-شارادا قازاقستاندىق تانىمال سۋرەتشىلەر مەن قولونەر شەبەرلەرىنىڭ، ۋنيۆەرسيتەت فوتوگراف-وقىتۋشىلارى مەن ستۋدەنتتەرىنىڭ كورمەسى ۇيىمداستىرىلدى.
وقۋ ورنىنىڭ باسقارما ءتوراعاسى – رەكتورى جانسەيىت تۇيمەبايەۆ جيىلعانداردى مەرەكەلىك شارا باعدارلاماسىمەن تانىستىرىپ، جاڭا فورماتتىڭ حالىقتى بىرىكتىرۋدەگى ماڭىزىنا توقتالدى.
«ناۋرىز-ارت» دەپ اتالعان شارادا تانىمال سۋرەتشىلەر مەن وقىتۋشى-ستۋدەنتتەردىڭ تۋىندىلارى جۇرتشىلىق نازارىنا تارتۋ ەتىلدى.
![](/uploads/images/20240127162152019.jpg)
ق ر كوركەمسۋرەت اكادەمياسىنىڭ پرەزيدەنتى، مەملەكەتتىك سىيلىعىنىڭ لاۋرەاتى اماندوس اقانايەۆ ءوز سوزىندە وسىنداي يگى-شارالاردىڭ جاستار بويىنداعى رۋحاني قۇندىلىقتاردى قالىپتاستىرىپ، مادەني تانىمىن تولىقتىرارىنا سەنىم ءبىلدىردى.
وننان اسا فاكۋلتەت وقىتۋشىلارى مەن جيىرماعا جۋىق ستۋدەنتتەردىڭ اۋەسقوي ەڭبەكتەرى كوپشىلىكتىڭ قىزىعۋشىلىعىن تۋدىرىپ، جوعارى باعاعا يە بولدى.
بارلىق تۋىندىلار ناۋرىز تۇجىرىمداماسىنداعى «كورىسۋ كۇنى»، «جايلاۋ كۇنى»، «شەجىرە كۇنى»، «تاريحقا تاعزىم كۇنى»، «يگى ىستەر كۇنى»، «شىمىرلىق پەن شەبەرلىك كۇنى»، «زياتكەرلىك كۇنى»، «ۇلتتىق تاعامدار كۇنى»، «ۇلىستىڭ ۇلى كۇنى»، «جورالعى كۇنىن» نەگىزدەپ، ءداستۇرلى قۇندىلىقتاردى دارىپتەۋگە ارنالدى.
ۇلىستىڭ ۇلى كۇنىن تاماشالاۋعا تۇركىتىلدەس ەلدەر پارلامەنتتىك اسسامبلەياسى جانە شەتەلدىك ديپلوماتيالىق كورپۋس وكىلدەرى مەن كونسۋلدار دا ارنايى كەلىپ، مەيماندار مەرەكەلىك باعدارلامامەن تانىسىپ، ناۋرىز مەيرامىنىڭ الەم ەلدەرىندە تويلانۋ داستۇرىنە ەرەكشە نازار اۋداردى. سونىمەن قاتار ۋنيۆەرسيتەتتە «شەبەرلەر اۋىلى» بوي كوتەردى. كورمە اعاش بۇيىمدار، ۇلتتىق اسپاپ شەبەرلەرى، قىش-قۇمىرا، اشەكەي بۇيىم زەرگەرلەرى، ىسمەرلەر مەن توقىماشىلار قولىنان شىققان ساندىك-قولدانبالارى تۋىندىلارمەن ەرەكشەلەندى.
«قاسكەلەڭ» مادەنيەت كوللەدجىنىڭ وقىتۋشىلارى مەن ستۋدەنتتەرى دومبىرا، قوبىز، شەرتەر اسپاپتارى، قىمىز كەسەلەر مەن استاۋلار، قۇراق كورپە، كەستە، ساندىق جانە باسقا دا تۇرمىستىق زاتتاردىڭ جاسالۋى بويىنشا شەبەرلىك ءدارىس وتكىزدى.
![](/uploads/images/20240127162152436.jpg)
ارنايى تىگىلگەن كيىز ۇيلەر مەن شاتىرلاردا كوپشىلىككە ناۋرىز كوجە، باۋىرساق، پالاۋ تاراتىلىپ، تۇساۋكەسەر، باتا بەرۋ سياقتى ۇلتتىق سالت-داستۇرلەر كورسەتىلىپ، قازاقشا كۇرەس، توعىز قۇمالاق، دويبى، قول كۇرەس جانە باسقا سپورتتىق ويىندار تارتۋ ەتىلدى.
ناۋرىز مەرەكەسى وقىتۋشى-ستۋدەنتتەردىڭ قاتىسۋىمەن بارلىق جاتاقحانادا اتاپ ءوتىلدى.
ءال-فارابي اتىنداعى قازۇۋ-دىڭ باسپا ءسوز قىزمەتى