Ál-Farabi atyndaǵy QazUÝ túrkiialyq «Görkem Co.» kompaniiasymen IT-tehnologiialar, innovatsiialar men meditsina salasyndaǵy zertteýlerdi damytý jáne joǵary bilikti mamandardy daiarlaý úshin qajetti obektiler qurylysyn bastaý týraly uzaq merzimdi investitsiialyq kelisimge qol qoidy. Taraptar kelisimdi kezeń-kezeńimen iske asyrý týraly ýaǵdalastyqqa qol jetkizdi. Investitsiianyń jalpy somasy 1 mlrd. AQSh dollary.
Búginde álemniń jetekshi ýniversitetteri adami kapitaldy qalyptastyra otyryp, innovatsiialyq ekonomikanyń ósý núktesi retinde óz elderi men tutas óńirlerdiń damýyn aiqyndaýda.
Damyǵan elderdiń ozyq tájiribesi kórsetip otyrǵandai, mundai tehnologiialyq alqaptar ǵylym, bilim jáne innovatsiialyq óndiristiń úshtuǵyrlyǵy negizinde iri ýniversitetter bazasynda qalyptasady.
QazUÝ maqsatty túrde álemdik deńgeidegi zertteý ýniversitetine ainala otyryp «Ál-Farabi» ǵylymi-tehnologiialyq alqabyn qurý bastamasyn alǵa tartty. Joba Elbasy N.Nazarbaevtyń qoldaýyna ie boldy. Álemniń 150-den astam jetekshi joǵary oqý oryndaryn biriktiretin «Jańa Jibek joly ýniversitetteriniń Aliansy» Halyqaralyq IT-klasterin qurý boiynsha jumystar júrgizilýde. Onyń ózegin «Silicon Valley» modelindegi IT-tehnopark jáne QHR úkimetiniń granty boiynsha QazUÝ-ǵa usynylatyn sýperkompiýter quraidy. Bul týraly kelisimge el Prezidenti Q.Toqaevtyń Qytaiǵa sapary barysynda qol jetkizildi.
Sondai-aq, ǴTA quramyna innovatsiialyq jáne mediko-biologiialyq klasterler kiredi. Ǵylymi-zertteý zerthanasy bar 500 oryndyq kópsalaly klinika salynatyn bolady. Mediko-biologiialyq klasterdi qurý álemdik deńgeide meditsinalyq qyzmetter kórsetýge, zamanaýi tehnologiialar transfertin júzege asyrýǵa, sonymen birge O.Koreia, Kanada, Túrkiia jáne AQSh meditsinasyndaǵy menedjmenttiń ozyq tájiribesin paidalanýǵa múmkindik beredi.
«Iri investitsiialyq jobany iske asyrý úshin biz QazUÝ-dy kezdeisoq tańdaǵan joqpyz. Biz senimdi ári bolashaǵy zor seriktes tabý maqsatynda qazaqstandyq bilim berý naryǵyn muqiiat zerttedik. Ǵalamdyq reitingte 165 orynǵa ie Túrki jáne Islam áleminiń úzdik ýniversitetimen yntymaqtastyq halyqaralyq deńgeidegi jobany júzege asyrýda jańa múmkindikter ashyp, dostas elderimizdiń qarym-qatynasyn odan ári nyǵaitýǵa múmkindik beredi», – dedi kezdesý barysynda «Görkem Co.» kompaniiasynyń bas direktory Osman Mimarsinanoglý.
Shartqa sáikes investor obektilerdi salyp, olardy qajetti jabdyqtarmen jabdyqtaidy jáne memlekettik menshikke tapsyrady. Shyǵyndardy óteý birlesken operatsiialyq qyzmet esebinen júzege asyrylady. Aǵymdaǵy jyly investitsiialyq jobanyń birinshi kezeńin iske asyrýdy bastaý josparlanýda.
