ءال-فارابي اتىنداعى قازۇۋ تۇركيالىق «Görkem Co.» كومپانياسىمەن IT-تەحنولوگيالار، يننوۆاسيالار مەن مەديسينا سالاسىنداعى زەرتتەۋلەردى دامىتۋ جانە جوعارى بىلىكتى مامانداردى دايارلاۋ ءۇشىن قاجەتتى وبەكتىلەر قۇرىلىسىن باستاۋ تۋرالى ۇزاق مەرزىمدى ينۆەستيسيالىق كەلىسىمگە قول قويدى. تاراپتار كەلىسىمدى كەزەڭ-كەزەڭىمەن ىسكە اسىرۋ تۋرالى ۋاعدالاستىققا قول جەتكىزدى. ينۆەستيسيانىڭ جالپى سوماسى 1 ملرد. اقش دوللارى.
بۇگىندە الەمنىڭ جەتەكشى ۋنيۆەرسيتەتتەرى ادامي كاپيتالدى قالىپتاستىرا وتىرىپ، يننوۆاسيالىق ەكونوميكانىڭ ءوسۋ نۇكتەسى رەتىندە ءوز ەلدەرى مەن تۇتاس وڭىرلەردىڭ دامۋىن ايقىنداۋدا.
دامىعان ەلدەردىڭ وزىق تاجىريبەسى كورسەتىپ وتىرعانداي، مۇنداي تەحنولوگيالىق القاپتار عىلىم، ءبىلىم جانە يننوۆاسيالىق ءوندىرىستىڭ ءۇشتۇعىرلىعى نەگىزىندە ءىرى ۋنيۆەرسيتەتتەر بازاسىندا قالىپتاسادى.
قازۇۋ ماقساتتى تۇردە الەمدىك دەڭگەيدەگى زەرتتەۋ ۋنيۆەرسيتەتىنە اينالا وتىرىپ «ءال-فارابي» عىلىمي-تەحنولوگيالىق القابىن قۇرۋ باستاماسىن العا تارتتى. جوبا ەلباسى ن.نازاربايەۆتىڭ قولداۋىنا يە بولدى. الەمنىڭ 150-دەن استام جەتەكشى جوعارى وقۋ ورىندارىن بىرىكتىرەتىن «جاڭا جىبەك جولى ۋنيۆەرسيتەتتەرىنىڭ اليانسى» حالىقارالىق IT-كلاستەرىن قۇرۋ بويىنشا جۇمىستار جۇرگىزىلۋدە. ونىڭ وزەگىن «Silicon Valley» مودەلىندەگى IT-تەحنوپارك جانە قحر ۇكىمەتىنىڭ گرانتى بويىنشا قازۇۋ-عا ۇسىنىلاتىن سۋپەركومپيۋتەر قۇرايدى. بۇل تۋرالى كەلىسىمگە ەل پرەزيدەنتى ق.توقايەۆتىڭ قىتايعا ساپارى بارىسىندا قول جەتكىزىلدى.
سونداي-اق، عتا قۇرامىنا يننوۆاسيالىق جانە مەديكو-بيولوگيالىق كلاستەرلەر كىرەدى. عىلىمي-زەرتتەۋ زەرتحاناسى بار 500 ورىندىق كوپسالالى كلينيكا سالىناتىن بولادى. مەديكو-بيولوگيالىق كلاستەردى قۇرۋ الەمدىك دەڭگەيدە مەديسينالىق قىزمەتتەر كورسەتۋگە، زاماناۋي تەحنولوگيالار ترانسفەرتىن جۇزەگە اسىرۋعا، سونىمەن بىرگە و.كورەيا، كانادا، تۇركيا جانە اقش مەديسيناسىنداعى مەنەدجمەنتتىڭ وزىق تاجىريبەسىن پايدالانۋعا مۇمكىندىك بەرەدى.
«ءىرى ينۆەستيسيالىق جوبانى ىسكە اسىرۋ ءۇشىن ءبىز قازۇۋ-دى كەزدەيسوق تاڭداعان جوقپىز. ءبىز سەنىمدى ءارى بولاشاعى زور سەرىكتەس تابۋ ماقساتىندا قازاقستاندىق ءبىلىم بەرۋ نارىعىن مۇقيات زەرتتەدىك. عالامدىق رەيتينگتە 165 ورىنعا يە تۇركى جانە يسلام الەمىنىڭ ۇزدىك ۋنيۆەرسيتەتىمەن ىنتىماقتاستىق حالىقارالىق دەڭگەيدەگى جوبانى جۇزەگە اسىرۋدا جاڭا مۇمكىندىكتەر اشىپ، دوستاس ەلدەرىمىزدىڭ قارىم-قاتىناسىن ودان ءارى نىعايتۋعا مۇمكىندىك بەرەدى»، – دەدى كەزدەسۋ بارىسىندا «Görkem Co.» كومپانياسىنىڭ باس ديرەكتورى وسمان ميمارسينانوگلۋ.
شارتقا سايكەس ينۆەستور وبەكتىلەردى سالىپ، ولاردى قاجەتتى جابدىقتارمەن جابدىقتايدى جانە مەملەكەتتىك مەنشىككە تاپسىرادى. شىعىنداردى وتەۋ بىرلەسكەن وپەراسيالىق قىزمەت ەسەبىنەن جۇزەگە اسىرىلادى. اعىمداعى جىلى ينۆەستيسيالىق جوبانىڭ ءبىرىنشى كەزەڭىن ىسكە اسىرۋدى باستاۋ جوسپارلانۋدا.
