Ál-Farabi atyndaǵy QazUÝ-dyń aqparattyq tehnologiialar fakýltetinde «Qazaqstan Halyq Banki» AQ qoldaýymen «Halyk Academy» atty zerthananyń ashylý saltanaty ótti, dep habarlaidy Dalanews.kz.
Jańa býyn mamandaryn daiarlaýǵa arnalǵan zerthana stýdentterge qarjy salasynda praktikalyq bilim men tájiribe alýǵa biregei múmkindik berý maqsatynda quryldy. Bul óz kezeginde bank jáne qarjy sektoryna joǵary bilikti mamandar daiarlaýǵa yqpal etedi.
Saltanatty sharaǵa Qazaqstan Halyq bankiniń resmi ókilderi men QazUÝ ǵalymdary jáne stýdentter qatysty.
Jiynǵa qatysýshylardy zerthananyń ashylý saltanatymen quttyqtaǵan Ál-Farabi atyndaǵy QazUÝ-dyń Basqarma Tóraǵasynyń orynbasary m.a. – birinshi prorektor Erkin Dúisenov: «Bizdiń birlesken áriptestigimizdiń negizinde búgingi zerthana ashylyp otyr. Bul óz kezeginde stýdent jastardyń ýniversitet qabyrǵasynda alyp jatqan teoriialyq bilimderin praktikamen ushtastyrýǵa berilgen biregei múmkindik. Zerthanada stýdent jastar qarjy salasynda bilim men ártúrli daǵdylardy meńgerip, bolashaqta tabysty jumys istei alady. Sondyqtan bizdiń Qazaqstan Halyq bankimen áriptestigimiz ary qarai nyǵaia beretinine senimim mol», – dedi prorektor.
Óz kezeginde Halyq banki basqarma tóraǵasynyń orynbasary Dáýren Sartaev ta pikir bildirdi.
«Qazaqstannyń jetekshi joǵary oqý oryndarynyń biri – Ál-Farabi atyndaǵy QazUÝ-da stýdentterge arnalǵan zerthanamyzdyń ashylýy biz úshin úlken mártebe. Búginde aqparattyq tehnologiialar fakýltetiniń túlekteri ártúrli salada qyzmet etip, óz biliktilikterin kórsetýde. Oǵan dálel – bizdiń Halyq banktiń HR direktory Indira Ashirova osy fakýltettiń túlegi, óz salasynyń kásibi mamany. Sondyqtan da fakýltet matematika, qarjy, IT salasynyń myqty irgetasy qalanǵan úlken mektep bolyp qala beredi», – dedi ol.
Búginde «Qazaqstan Halyq Banki» AQ Ál-Farabi atyndaǵy QazUÝ-dyń negizgi seriktesi ǵana emes, sonymen qatar bakalavriat, magistratýra jáne doktorantýra deńgeilerinde «Derekter týraly ǵylym/Data Science» bilim berý baǵdarlamasynyń birlesken qurastyrýshysy jáne jumys berýshisi bolyp tabylady. Bul tásil oqý baǵdarlamasy men kásibi standarttardyń úilesimdiligin qamtamasyz etip, túlekterge keńinen mansaptyq jol ashyp, dinamikalyq damyp kele jatqan derekter salasynda jumys isteýge múmkindik beredi.
Ashylǵan zerthana baǵdarlamasy aiasynda stýdentterge bank sarapshylarynyń dáristeri, ashyq esik kúnderi, sondai-aq indýstriianyń zamanaýi talaptaryn eskere otyryp ázirlengen banktik mamandyqtar boiynsha kýrstar ótetin bolady. Sonymen qatar akademiia aiasynda ǵylymi zertteýler men tehnologiialyq ázirlemelerdi (R&D) damytý josparlanýda. Bul stýdentter men oqytýshylarǵa qarjy salasyndaǵy innovatsiialardyń damýyna yqpal etetin ózekti jobalarmen jumys isteýge múmkindik beredi.
Ál-Farabi atyndaǵy QazUÝ-dyń Baspasóz qyzmeti
