ءال-فارابي اتىنداعى قازۇۋ-دىڭ اقپاراتتىق تەحنولوگيالار فاكۋلتەتىندە «قازاقستان حالىق بانكى» اق قولداۋىمەن «Halyk Academy» اتتى زەرتحانانىڭ اشىلۋ سالتاناتى ءوتتى، دەپ حابارلايدى Dalanews.kz.
جاڭا بۋىن ماماندارىن دايارلاۋعا ارنالعان زەرتحانا ستۋدەنتتەرگە قارجى سالاسىندا پراكتيكالىق ءبىلىم مەن تاجىريبە الۋعا بىرەگەي مۇمكىندىك بەرۋ ماقساتىندا قۇرىلدى. بۇل ءوز كەزەگىندە بانك جانە قارجى سەكتورىنا جوعارى بىلىكتى ماماندار دايارلاۋعا ىقپال ەتەدى.
سالتاناتتى شاراعا قازاقستان حالىق بانكىنىڭ رەسمي وكىلدەرى مەن قازۇۋ عالىمدارى جانە ستۋدەنتتەر قاتىستى.
جيىنعا قاتىسۋشىلاردى زەرتحانانىڭ اشىلۋ سالتاناتىمەن قۇتتىقتاعان ءال-فارابي اتىنداعى قازۇۋ-دىڭ باسقارما ءتوراعاسىنىڭ ورىنباسارى م.ا. – ءبىرىنشى پرورەكتور ەركىن دۇيسەنوۆ: «ءبىزدىڭ بىرلەسكەن ارىپتەستىگىمىزدىڭ نەگىزىندە بۇگىنگى زەرتحانا اشىلىپ وتىر. بۇل ءوز كەزەگىندە ستۋدەنت جاستاردىڭ ۋنيۆەرسيتەت قابىرعاسىندا الىپ جاتقان تەوريالىق بىلىمدەرىن پراكتيكامەن ۇشتاستىرۋعا بەرىلگەن بىرەگەي مۇمكىندىك. زەرتحانادا ستۋدەنت جاستار قارجى سالاسىندا ءبىلىم مەن ءارتۇرلى داعدىلاردى مەڭگەرىپ، بولاشاقتا تابىستى جۇمىس ىستەي الادى. سوندىقتان ءبىزدىڭ قازاقستان حالىق بانكىمەن ارىپتەستىگىمىز ارى قاراي نىعايا بەرەتىنىنە سەنىمىم مول»، – دەدى پرورەكتور.
ءوز كەزەگىندە حالىق بانكى باسقارما ءتوراعاسىنىڭ ورىنباسارى داۋرەن سارتايەۆ تا پىكىر ءبىلدىردى.
«قازاقستاننىڭ جەتەكشى جوعارى وقۋ ورىندارىنىڭ ءبىرى – ءال-فارابي اتىنداعى قازۇۋ-دا ستۋدەنتتەرگە ارنالعان زەرتحانامىزدىڭ اشىلۋى ءبىز ءۇشىن ۇلكەن مارتەبە. بۇگىندە اقپاراتتىق تەحنولوگيالار فاكۋلتەتىنىڭ تۇلەكتەرى ءارتۇرلى سالادا قىزمەت ەتىپ، ءوز بىلىكتىلىكتەرىن كورسەتۋدە. وعان دالەل – ءبىزدىڭ حالىق بانكتىڭ HR ديرەكتورى ينديرا اشيروۆا وسى فاكۋلتەتتىڭ تۇلەگى، ءوز سالاسىنىڭ كاسىبي مامانى. سوندىقتان دا فاكۋلتەت ماتەماتيكا، قارجى، IT سالاسىنىڭ مىقتى ىرگەتاسى قالانعان ۇلكەن مەكتەپ بولىپ قالا بەرەدى»، – دەدى ول.
بۇگىندە «قازاقستان حالىق بانكى» اق ءال-فارابي اتىنداعى قازۇۋ-دىڭ نەگىزگى سەرىكتەسى عانا ەمەس، سونىمەن قاتار باكالاۆريات، ماگيستراتۋرا جانە دوكتورانتۋرا دەڭگەيلەرىندە «دەرەكتەر تۋرالى عىلىم/Data Science» ءبىلىم بەرۋ باعدارلاماسىنىڭ بىرلەسكەن قۇراستىرۋشىسى جانە جۇمىس بەرۋشىسى بولىپ تابىلادى. بۇل ءتاسىل وقۋ باعدارلاماسى مەن كاسىبي ستاندارتتاردىڭ ۇيلەسىمدىلىگىن قامتاماسىز ەتىپ، تۇلەكتەرگە كەڭىنەن مانساپتىق جول اشىپ، ديناميكالىق دامىپ كەلە جاتقان دەرەكتەر سالاسىندا جۇمىس ىستەۋگە مۇمكىندىك بەرەدى.
اشىلعان زەرتحانا باعدارلاماسى اياسىندا ستۋدەنتتەرگە بانك ساراپشىلارىنىڭ دارىستەرى، اشىق ەسىك كۇندەرى، سونداي-اق يندۋستريانىڭ زاماناۋي تالاپتارىن ەسكەرە وتىرىپ ازىرلەنگەن بانكتىك ماماندىقتار بويىنشا كۋرستار وتەتىن بولادى. سونىمەن قاتار اكادەميا اياسىندا عىلىمي زەرتتەۋلەر مەن تەحنولوگيالىق ازىرلەمەلەردى (R&D) دامىتۋ جوسپارلانۋدا. بۇل ستۋدەنتتەر مەن وقىتۋشىلارعا قارجى سالاسىنداعى يننوۆاسيالاردىڭ دامۋىنا ىقپال ەتەتىن وزەكتى جوبالارمەن جۇمىس ىستەۋگە مۇمكىندىك بەرەدى.
ءال-فارابي اتىنداعى قازۇۋ-دىڭ باسپا ءسوز قىزمەتى
