Ál-Farabi atyndaǵy Qazaq ulttyq ýniversitetinde «Joǵary oqý ornynyń úzdik oqytýshysy – 2024» jáne «Úzdik ǵylymi qyzmetker» ataǵy iegerlerin marapattaý rásimi ótti,- dep habarlaidy Dalanews.kz Ál-Farabi atyndaǵy QazUÝ-dyń baspasóz qyzmetine silteme jasap.
Saltanatty sharaǵa Qazaqstan Respýblikasynyń ǵylym jáne joǵary bilim ministri Saiasat Nurbek, Ál-Farabi atyndaǵy QazUÝ Basqarma Tóraǵasy – Rektor Janseiit Túimebaev, ǴZI jáne JOO basshylary, Qazaqstannyń kórnekti ǵalymdary men oqytýshylary qatysty.
2005 jyldan bastap «Joǵary oqý ornynyń úzdik oqytýshysy» ataǵy olarǵa dástúrli túrde oqytýshylyq jáne ǵylymi qyzmettegi joǵary jetistikteri úshin beriledi.
Is-shara rásiminiń ashylýynda ǵylym jáne joǵary bilim ministri Saiasat Nurbek barlyq jeńimpaz oqytýshylardy quttyqtap, ǵylym men bilim salasyndaǵy orasan zor eńbekteri úshin alǵys aitty.
Saltanatty jiynda Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektor Janseiit Túimebaev quttyqtaý sóz sóilep, oqytýshylardyń zor eńbegi men olardyń bilim men ǵylymdy damytýǵa qosqan úlesin atap ótti.
2024 jylǵy «Joǵary oqý ornynyń úzdik oqytýshysy» tósbelgisi Qazaqstannyń 200 oqytýshysyna tabystaldy, onyń ishinde Ál-Farabi atyndaǵy QazUÝ-dyń 36 oqytýshysy joǵary marapatqa ie boldy. Ár jeńimpaz 2000 AEK kóleminde aqshalai yntalandyrý syiaqysyn alady. Olardyń qatarynda baiqaýda eń joǵary ball jinaǵan QazUÝ-dyń Jylýfizika jáne tehnikalyq fizika kafedrasynyń meńgerýshisi, fizika-matematika ǵylymdarynyń doktory, professor Saltanat Bólegenova bar.
«35 jyldan beri osy ýniversitette eńbek etip, «Joǵary oqý ornynyń úzdik oqytýshysy» marapatyn úshinshi márte alyp otyrmyn. Meniń árbir jetistigim – eń birinshi QazUÝ-daǵy ustazdarymnan alǵan bilim men tájiribe jáne ýniversitettiń ǵylym jolynda bergen tálim-tárbiesi dep bilemin», – dedi professor S.Bólegenova.
Oqytýshy 35 jyl ishinde 15 patent alyp, 10 monografiia, 45 oqý quralyn jáne 400-den asa ǵylymi maqala jariialady.
«2024 jyldyń úzdik ǵylymi qyzmetkeri» nominatsiiasyna 41 adam ie boldy. Olardyń qatarynda Ál-Farabi atyndaǵy QazUÝ oqytýshylary Habibýlla Abdýllin, Nuraly Ákimbekov, Natalia Glýshkova jáne Rima Jansaraeva marapattaldy.
Úzdikterdi marapattaý rásiminde sondai-aq Ál-Farabi atyndaǵy QazUÝ-dyń filologiia fakýlteti Shetel filologiiasy jáne aýdarma isi kafedrasynyń aǵa oqytýshysy Gúlsim Súleimenovaǵa bilim men ǵylymdy damytýǵa eleýli úles qosyp, órkendeý jolynda atqarǵan abyroily eńbegi men adal qyzmeti úshin QR ǵylym jáne joǵary bilim ministriniń Qurmet gramotasy tabystaldy. Ardager oqytýshy ýniversitette 57 jyldan beri aǵylshyn tilinen dáris berip qana qoimai, elimizde ótken joǵary deńgeidegi kezdesýlerge ilespe aýdarmashy retinde qatysyp keledi.
Is-shara aiasynda jeńimpazdar úshin QazUÝ qalashyǵyna ekskýrsiia ótkizildi. Olar QazUÝ-dyń ǵylymi zerthanalary men ortalyqtaryn aralap, «Farabi Hub» innovatsiialyq ónimder men joǵary tehnologiialyq jobalar ortalyǵynda, Jerdi qashyqtyqtan zondtaý, Robototehnika ortalyqtarynda boldy. Sonymen qatar qonaqtar QazUÝ-da ornatylǵan Ortalyq Aziiada teńdesi joq eń qýatty sýperkompiýterdiń jumysymen tanysty.
