ءال-فارابي اتىنداعى قازاق ۇلتتىق ۋنيۆەرسيتەتىندە «جوعارى وقۋ ورنىنىڭ ۇزدىك وقىتۋشىسى – 2024» جانە «ۇزدىك عىلىمي قىزمەتكەر» اتاعى يەگەرلەرىن ماراپاتتاۋ ءراسىمى ءوتتى،- دەپ حابارلايدى Dalanews.kz ءال-فارابي اتىنداعى قازۇۋ-دىڭ باسپا ءسوز قىزمەتىنە سىلتەمە جاساپ.
سالتاناتتى شاراعا قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك، ءال-فارابي اتىنداعى قازۇۋ باسقارما ءتوراعاسى – رەكتور جانسەيىت تۇيمەبايەۆ، عزي جانە جوو باسشىلارى، قازاقستاننىڭ كورنەكتى عالىمدارى مەن وقىتۋشىلارى قاتىستى.
2005 جىلدان باستاپ «جوعارى وقۋ ورنىنىڭ ۇزدىك وقىتۋشىسى» اتاعى ولارعا ءداستۇرلى تۇردە وقىتۋشىلىق جانە عىلىمي قىزمەتتەگى جوعارى جەتىستىكتەرى ءۇشىن بەرىلەدى.
ءىس-شارا ءراسىمىنىڭ اشىلۋىندا عىلىم جانە جوعارى ءبىلىم ءمينيسترى ساياسات نۇربەك بارلىق جەڭىمپاز وقىتۋشىلاردى قۇتتىقتاپ، عىلىم مەن ءبىلىم سالاسىنداعى وراسان زور ەڭبەكتەرى ءۇشىن العىس ايتتى.
سالتاناتتى جيىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتور جانسەيىت تۇيمەبايەۆ قۇتتىقتاۋ ءسوز سويلەپ، وقىتۋشىلاردىڭ زور ەڭبەگى مەن ولاردىڭ ءبىلىم مەن عىلىمدى دامىتۋعا قوسقان ۇلەسىن اتاپ ءوتتى.
2024 جىلعى «جوعارى وقۋ ورنىنىڭ ۇزدىك وقىتۋشىسى» توسبەلگىسى قازاقستاننىڭ 200 وقىتۋشىسىنا تابىستالدى، ونىڭ ىشىندە ءال-فارابي اتىنداعى قازۇۋ-دىڭ 36 وقىتۋشىسى جوعارى ماراپاتقا يە بولدى. ءار جەڭىمپاز 2000 اەك كولەمىندە اقشالاي ىنتالاندىرۋ سىياقىسىن الادى. ولاردىڭ قاتارىندا بايقاۋدا ەڭ جوعارى بالل جيناعان قازۇۋ-دىڭ جىلۋفيزيكا جانە تەحنيكالىق فيزيكا كافەدراسىنىڭ مەڭگەرۋشىسى، فيزيكا-ماتەماتيكا عىلىمدارىنىڭ دوكتورى، پروفەسسور سالتانات بولەگەنوۆا بار.
«35 جىلدان بەرى وسى ۋنيۆەرسيتەتتە ەڭبەك ەتىپ، «جوعارى وقۋ ورنىنىڭ ۇزدىك وقىتۋشىسى» ماراپاتىن ءۇشىنشى مارتە الىپ وتىرمىن. مەنىڭ ءاربىر جەتىستىگىم – ەڭ ءبىرىنشى قازۇۋ-داعى ۇستازدارىمنان العان ءبىلىم مەن تاجىريبە جانە ۋنيۆەرسيتەتتىڭ عىلىم جولىندا بەرگەن تالىم-تاربيەسى دەپ بىلەمىن»، – دەدى پروفەسسور س.بولەگەنوۆا.
وقىتۋشى 35 جىل ىشىندە 15 پاتەنت الىپ، 10 مونوگرافيا، 45 وقۋ قۇرالىن جانە 400-دەن اسا عىلىمي ماقالا جاريالادى.
«2024 جىلدىڭ ۇزدىك عىلىمي قىزمەتكەرى» نوميناسياسىنا 41 ادام يە بولدى. ولاردىڭ قاتارىندا ءال-فارابي اتىنداعى قازۇۋ وقىتۋشىلارى حابيبۋللا ابدۋللين، نۇرالى اكىمبەكوۆ، ناتاليا گلۋشكوۆا جانە ريما جانسارايەۆا ماراپاتتالدى.
ۇزدىكتەردى ماراپاتتاۋ راسىمىندە سونداي-اق ءال-فارابي اتىنداعى قازۇۋ-دىڭ فيلولوگيا فاكۋلتەتى شەتەل فيلولوگياسى جانە اۋدارما ءىسى كافەدراسىنىڭ اعا وقىتۋشىسى گۇلسىم سۇلەيمەنوۆاعا ءبىلىم مەن عىلىمدى دامىتۋعا ەلەۋلى ۇلەس قوسىپ، وركەندەۋ جولىندا اتقارعان ابىرويلى ەڭبەگى مەن ادال قىزمەتى ءۇشىن ق ر عىلىم جانە جوعارى ءبىلىم ءمينيسترىنىڭ قۇرمەت گراموتاسى تابىستالدى. ارداگەر وقىتۋشى ۋنيۆەرسيتەتتە 57 جىلدان بەرى اعىلشىن تىلىنەن ءدارىس بەرىپ قانا قويماي، ەلىمىزدە وتكەن جوعارى دەڭگەيدەگى كەزدەسۋلەرگە ىلەسپە اۋدارماشى رەتىندە قاتىسىپ كەلەدى.
ءىس-شارا اياسىندا جەڭىمپازدار ءۇشىن قازۇۋ قالاشىعىنا ەكسكۋرسيا وتكىزىلدى. ولار قازۇۋ-دىڭ عىلىمي زەرتحانالارى مەن ورتالىقتارىن ارالاپ، «Farabi Hub» يننوۆاسيالىق ونىمدەر مەن جوعارى تەحنولوگيالىق جوبالار ورتالىعىندا، جەردى قاشىقتىقتان زوندتاۋ، روبوتوتەحنيكا ورتالىقتارىندا بولدى. سونىمەن قاتار قوناقتار قازۇۋ-دا ورناتىلعان ورتالىق ازيادا تەڭدەسى جوق ەڭ قۋاتتى سۋپەركومپيۋتەردىڭ جۇمىسىمەن تانىستى.
