Satiralyq Qaznews24 pabliginiń avtory Temirlan Eńsebektiń isi boiynsha sot protsesi taǵy da keiinge qaldyryldy, dep habarlaidy Dalanews.kz.
Kezekti sot otyrysy búgin, 21 aqpanda saǵat 10.00-de ótýi tiis bolatyn. Alaida, advokat Janara Balǵabaevanyń aitýynsha, tóraǵalyq etýshi sýdianyń «otbasylyq-jeke jaǵdailaryna» bailanysty sot protsesi belgisiz merzimge aýystyryldy.
Qazirgi ýaqytta tyńdaýdyń jańa kúni men ýaqyty belgilengen joq.
Aita keteiik, buǵan deiin Human Rights Watch (HRW) Qazaqstan úkimetinen Temirlan Eńsebekke qatysty aiyptardy alyp, ony túrmeden bosatýdy talap etken bolatyn.
Quqyq qorǵaýshylar bul qylmystyq qýdalaýdy shekten tys dep sanaidy. Olardyń aitýynsha, blogerdiń jariialaǵan jazbalarynda zorlyq-zombylyqqa nemese kemsitýshilikke shaqyrý bolmaǵan. Al, Qylmystyq kodekstiń 174-babyn («arazdyqty qozdyrý») sóz bostandyǵyn shekteý úshin paidalanyp otyr. Human Rights Watch bul Eńsebektiń birinshi ret qýdalanýy emestigin eske saldy: 2021 jyly oǵan jalǵan aqparat taratty degen aiyp taǵylyp, keiin is jabylǵan bolatyn.
"Qarapaiym tilmen aitqanda, bul jerde eshqandai qylmys joq, tek bilik tarapynan qylmystyq quqyqty asyra paidalaný bar. Qazaqstan úkimeti Eńsebekke qatysty negizsiz jáne shekten tys qylmystyq "arandatýshylyq" aiypty tez arada joiýy jáne ony sotqa deiin qamaýdan bosatýy qajet", – dedi Human Rights Watch uiymynyń Ortalyq Aziia boiynsha aǵa zertteýshisi Mira Rittmann.
Human Rights Watch Qazaqstan úkimetin sóz bostandyǵyn qorǵaýǵa jáne blogerge qarsy qylmystyq qýdalaýdy toqtatýǵa shaqyrdy.
Eske salaiyq, QazNews24 satiralyq pabliginiń avtory Temirlan Eńsebekti politsiia 17 qańtarda úiine tintý júrgizgennen keiin ustap áketken. 18 qańtarda Eńsebek eki aiǵa qamaýǵa alyndy. Oǵan "ultaralyq alaýyzdyq qozdyrdy" degen aiyp taǵylyp otyr. Politsiia qylmystyq istiń sebebi – ultaralyq arazdyqty qozdyrý jáne etnostardyń biriniń ókilderin qorlaý belgileri bar materialdy jariialaý bolǵan.
Belgili zańger Janar Balǵabaevanyń aitýynsha, Temirlan Eńsebektiń qamalýyna "Ioý, orystar" degen án túrtki bolǵan. Eńsebek bul ándi reseilik telejúrgizýshi Tina Kandelaki týraly postyna qosqan. Ánde balaǵat sózder bar.
Ol 174-bap "Áleýmettik, ulttyq, rýlyq, násildik, taptyq nemese dini alaýyzdyqty qozdyrý" boiynsha aiyptalyp otyr. Temirlan Eńsebek 2 jyldan 7 jylǵa deiin bas bostandyǵynan aiyrylýy múmkin.
