"QazMunaiGaz" Ulttyq kompaniiasy 2023 jyldyń jeltoqsanynda satyp alǵan Atyraýdaǵy tamaq plenkasyn shyǵaratyn zaýytty nege qaita satqandaryn túsindirdi, dep habarlaidy Dalanews.kz.
Bul arada reseilik "SIBÝR" holdingige satylǵan "Polimer Prodakshndaǵy" 60% úles týraly sóz bolyp otyr. Zaýyt nege olarǵa satyldy? Muny QMG bylai túsindiredi:
"Birinshiden, "Polimer Prodakshn" zaýyty paidalanatyn negizgi shikizat – polipropilendi "SIBÝR" holdingiden alady. Iaǵni, "SIBÝR" jylyna 180 myń tonna taýar óndirýge qabiletti, tamaq plenkasyn shyǵarýda úlken tájiribesi bar ári "Polimer Prodakshn" paidalanatyn polipropilen ónimin shyǵarý boiynsha seriktes bolyp tabylady. Ekinshiden, satý kezeńinde zaýyt jumys istemei turǵan, al jumysshylary ishinara ótemaqy tólenip, ýaqytsha demalysqa jiberilgen".
QMG atap ótkendei, kompaniianyń shyǵyny 5,8 mlrd teńgeni quraidy.
"Ony satyp alǵan sátten bastap óndiristi qalpyna keltirý jumystarymen ainalystyq, kásiporyn ujymy aldyndaǵy áleýmettik mindettemelerdi oryndaýdy jalǵastyrdyq. Biraq biz úshin, negizinen, tamaq ónerkásibinde býyp-túiý materialy retinde paidalanylatyn BOPP-plenkalar óndirisi qyzmetimizdiń beiindi túrine jatpaidy. Osyǵan bailanysty kásiporyndy ońaltýdy sapaly júrgizý úshin seriktesti tartý týraly sheshim qabyldandy", – dedi ulttyq kompaniia.
Qol jetkizilgen mámile "Polimer Prodakshn" óndiristik qýattaryn jedel qalpyna keltirý jónindegi jospardy iske asyrýǵa múmkindik beredi, ol úshin qomaqty investitsiialar salynbaq.
"Kestege sáikes, kásiporyndy qalpyna keltirý jáne óndiriske kóshý 2025 jyldyń III-IV toqsanyna sai keledi. Qazir zaýyt qyzmetkerleri biliktiligin arttyryp, "SIBÝR" kásiporyndarynda kásibi taǵylymdamadan ótýde", – deidi "QazMunaiGazdaǵylar".
Aita ketsek, "Polimer Prodakshn" JShS 2012 jyly Atyraý oblysynda polimer ónimderin óndirý jónindegi jobany iske asyrý úshin qurylǵan. Zaýyt 2015 jyly paidalanýǵa berildi. Qarjylyq qujattaǵy esepke sáikes, Polimer Production-nyń shyǵyny 2022 jylǵy 31 jeltoqsanda 27,59 mlrd teńgeni, kapital tapshylyǵy 6,02 mlrd teńgeni qurady. Odan bólek moinynda Samruk-Kazyna Ondeu arqyly alynǵan 12,1 mlrd jáne 11,05 mlrd teńgeniń nesie aqshasy taǵy bar. Sonymen qatar, qap pen plenka óndirýshi kásiporyn 2021 jyly 793 mln teńge, al 2022 jyly 1, 19 mlrd teńge qarjylai kómek aldy. Sondai-aq,2022 jyly kásiporynnyń jarǵylyq kapitalyna 3,3 mlrd teńge qarajat quiyldy.
2023 jylǵy jeltoqsanda Polimer Production jarǵylyq kapitalynyń 100%-y burynǵy ieleri - "Samruk-Kazyna Ondeu" JShS (99,9%) men "Taraz himiialyq parki" ÁEA basqarýshy kompaniiasynan (0,1%) "QazMunaiGaz "UK" AQ-nyń qolyna ótti. Ol kezde ulttyq kompaniia "muny munai-gaz-himiia aktivterin shoǵyrlandyrý jónindegi jumys boiynsha júrgizilgen dáiekti is-shara" dep atady.
Polimer Production qyzmetiniń negizgi túri - "KPI" JShS integratsiialanǵan gaz-himiia kesheninde alynatyn polipropilennen polimerli ónim óndirý. KPI-di QMG basqarady, sondyqtan Polimer Production-dy ulttyq kompaniianyń enshisine ótkizý Atyraý oblysyndaǵy biryńǵai gaz-himiia kesheni sheńberindegi jobalardyń sinergiiasyn qamtamasyz etedi, delingen sol kezdegi aqparatta. Al 2023 jyldyń jeltoqsanynda Polimer Production qatysýshynyń aýysýyna bailanysty memlekettik tirkeýden qaita ótti.
