"Otpan" jobasy boiynsha Mańǵystaý oblysynda shalǵai aýyldarda ornalasqan tirek mektepterdi damytý boiynsha jumys júrgizilýde. Atap aitqanda, "QazMunaiGaz" UK AQ qoldaýymen Taýshyq (Túpqaraǵan aýdany), Jetibai (Qaraqiia aýdany) jáne Rahat (Jańaózen qalasy) aýyldarynyń mektepterinde 50-den astam oqý kabineti men bilim berý keńistigi jańartyldy, dep habarlaidy Dalanews.kz.
Negizgi pánder boiynsha kabinetter, bastaýysh synyptary, tehnologiialyq sheberhanalar, sondai-aq himiia, fizika jáne biologiia pánderine arnalǵan tsifrly zerthanalar jańǵyrtyldy.
Oǵan qosa, túrli úiirmelerdi júrgizýge jaǵdai jasaldy. Úsh tirek mektepte robot tehnikasy kabinetteri, STEM-zerthanalar, art jáne telestýdiialar, sondai-aq oqýshylarǵa arnalǵan demalys oryndary ashyldy. Bul mektepterde 3,5 myńnan astam oqýshy bilim alady, al ujymda 380 pedagog qyzmet etedi.
Taýshyq, Jetibai jáne Rahat aýyldaryndaǵy mektepterge jergilikti turǵyndar, munai-gaz salasynyń ardagerleri men QMG ókilderi arnaiy keldi.
"QazMunaiGaz" "Otpan" jobasyna belsendi qatysyp, óńirdiń shalǵai aýyldarynda bilim berýdi damytýǵa jan-jaqty qoldaý kórsetýde. Oqý oryndaryn jańǵyrtý oqýshylardyń zamanaýi tehnologiialar men qosymsha bilim berý múmkindikterine qol jetkizýine jol ashady. Jalpy, QMG qyzmetin júrgizetin óńirlerde áleýmettik jobalardy turaqty negizde iske asyryp keledi", — dep atap ótti "QazMunaiGaz" UK AQ Basqarma tóraǵasynyń orynbasary Bekzat Abaiyldanov.
Taýshyq aýylynyń týmasy, "QazMunaiGaz" ulttyq kompaniiasynyń tuńǵysh prezidenti Lázzat Qiynovtyń ata-anasy osy mektepte muǵalim bolyp eńbek etken. Ardager munaishy óz kezeginde mundai bastamalardyń, ásirese aýyldyq jerlerde bilim berý infraqurylymyn damytýdyń mańyzyn atap ótti.
"Bilim — qoǵam damýynyń kepili. "Otpan" jobasy arqyly aýyl balalarynyń oqý jaǵdaiy qanshalyqty jaqsaryp jatqanyn kórgenime qýanyshtymyn. Mundai bastamalar arqyly balalarymyzdyń jarqyn bolashaǵyna jol ashatynymyzǵa senimdimin", — dedi munai-gaz salasynyń ardageri L.Qiynov.
Úkimet bastamasymen biyl sáýir aiynda bastaý alǵan "Otpan" jobasy bilim berý sapasyn arttyrýǵa baǵyttalǵan. Jobaǵa Mańǵystaý oblysynyń 50 mektebi qatysady, bul mektepterde 60 myń oqýshy oqyp, 7 myń pedagog jumys isteidi. Jobany Bilim berý salasyn turaqty damytý qory iske asyrady. Qor 2019 jyldan bastap elimizde tirek mektepter jelisin qurýmen belsendi ainalysady. Joba aiasynda "Nazarbaev ziiatkerlik mektepteri" DBBU men "Bilim-innovatsiia" HQQ tájiribesi negizinde muǵalimderdi oqytý jáne tájiribe almasý uiymdastyrylady, sondai-aq mektepterdiń materialdyq-tehnikalyq bazasy jańartylady.
