Joǵary aýditorlyq palata tóraǵasy Álihan Smaiylov “QazMunaiGaz” jáne “Báiterek” ulttyq kompaniialarynda buryn jariialanǵan aýdittik tekserýlerdiń nátijeleri qashan belgili bolatynyn aitty, - dep habarlaidy Dalanews.kz.
Onyń aitýynsha, tekserýler áli aiaqtalǵan joq, jumys jalǵasýda.
“Qazirgi ýaqytta qandai da bir nátijeler týraly aitý erte. Bul jumys áli júrip jatyr. Birinshi toqsannyń qorytyndysy boiynsha, shamamen 2025 jyldyń naýryz aiynyń sońyna qarai, bizde “Samuryq-Qazynadaǵy” tiimdilik aýditi men “Báiterek” kompaniiasy jáne oǵan qarasty uiymdardaǵy qaryzdy basqarý aýditiniń nátijeleri bolady”, – dedi Smaiylov Májilis kýlýarynda.
Ol Joǵary aýditorlyq palata aýdit nátijelerin jurtshylyqqa jariialaitynyn ýáde etti.
Eske salaiyq, búgin Májilis depýtattary aldyna shyqqan Joǵary aýditorlyq palatanyń tóraǵasy Álihan Smaiylov osylai dei kele, kóptiń júregin aýyrtatyn - aýyl, onda da aýylsharýashylyǵy salasyndaǵy túiitkildi máselelerge, ásirese sýbsidiia jaiyna erekshe toqtaldy.
Aýyl sharýashylyǵynyń ekonomikalyq mańyzdylyǵy joǵary bola tura, ókinishke qarai, elimizdiń jalpy ishki ónimine qosatyn úlesi az, naqtyraq aitsaq, orta eseppen 5%-ǵa jýyq. Smaiylov aýylsharýashylyǵy salasynyń kegejesin kerige tartyp jatqan basty bes sebepti atady:
- ónimdiliktiń tómen bolýy,
- sýarmaly jer kólemin ulǵaitý qarqynynyń baiaýlyǵy,
- sýdy tiimsiz paidalaný,
- kólik-logistikalyq infraqurylymnyń álsiz damýy,
- materialdyq-tehnikalyq jaraqtandyrýdyń jetkiliksizdigi jáne basqalar.
Osy problemalardy sheshýde, Úkimet sýbsidiialaý úlken ról atqarýy tiis dep sanaidy. Al shyntýaitynda, bul qural ózindik maqsatyn tiimdi atqara alyp otyr ma? Mine, osyndai sipattaǵy Májilistiń tapsyrmasyna sáikes, Joǵary aýditorlyq palata aýdit júrgizgen bolyp shyqty.
