جوعارى اۋديتورلىق پالاتا ءتوراعاسى ءاليحان سمايىلوۆ “قازمۇنايگاز” جانە “بايتەرەك” ۇلتتىق كومپانيالارىندا بۇرىن جاريالانعان اۋديتتىك تەكسەرۋلەردىڭ ناتيجەلەرى قاشان بەلگىلى بولاتىنىن ايتتى، - دەپ حابارلايدى Dalanews.kz.
ونىڭ ايتۋىنشا، تەكسەرۋلەر ءالى اياقتالعان جوق، جۇمىس جالعاسۋدا.
“قازىرگى ۋاقىتتا قانداي دا ءبىر ناتيجەلەر تۋرالى ايتۋ ەرتە. بۇل جۇمىس ءالى ءجۇرىپ جاتىر. ءبىرىنشى توقساننىڭ قورىتىندىسى بويىنشا، شامامەن 2025 جىلدىڭ ناۋرىز ايىنىڭ سوڭىنا قاراي، بىزدە “سامۇرىق-قازىناداعى” تيىمدىلىك ءاۋديتى مەن “بايتەرەك” كومپانياسى جانە وعان قاراستى ۇيىمدارداعى قارىزدى باسقارۋ ءاۋديتىنىڭ ناتيجەلەرى بولادى”، – دەدى سمايىلوۆ ءماجىلىس كۋلۋارىندا.
ول جوعارى اۋديتورلىق پالاتا اۋديت ناتيجەلەرىن جۇرتشىلىققا جاريالايتىنىن ۋادە ەتتى.
ەسكە سالايىق، بۇگىن ءماجىلىس دەپۋتاتتارى الدىنا شىققان جوعارى اۋديتورلىق پالاتانىڭ ءتوراعاسى ءاليحان سمايىلوۆ وسىلاي دەي كەلە، كوپتىڭ جۇرەگىن اۋىرتاتىن - اۋىل، وندا دا اۋىلشارۋاشىلىعى سالاسىنداعى تۇيىتكىلدى ماسەلەلەرگە، اسىرەسە سۋبسيديا جايىنا ەرەكشە توقتالدى.
اۋىل شارۋاشىلىعىنىڭ ەكونوميكالىق ماڭىزدىلىعى جوعارى بولا تۇرا، وكىنىشكە قاراي، ەلىمىزدىڭ جالپى ىشكى ونىمىنە قوساتىن ۇلەسى از، ناقتىراق ايتساق، ورتا ەسەپپەن 5%-عا جۋىق. سمايىلوۆ اۋىلشارۋاشىلىعى سالاسىنىڭ كەگەجەسىن كەرىگە تارتىپ جاتقان باستى بەس سەبەپتى اتادى:
- ونىمدىلىكتىڭ تومەن بولۋى،
- سۋارمالى جەر كولەمىن ۇلعايتۋ قارقىنىنىڭ باياۋلىعى،
- سۋدى ءتيىمسىز پايدالانۋ،
- كولىك-لوگيستيكالىق ينفراقۇرىلىمنىڭ ءالسىز دامۋى،
- ماتەريالدىق-تەحنيكالىق جاراقتاندىرۋدىڭ جەتكىلىكسىزدىگى جانە باسقالار.
وسى پروبلەمالاردى شەشۋدە، ۇكىمەت سۋبسيديالاۋ ۇلكەن ءرول اتقارۋى ءتيىس دەپ سانايدى. ال شىنتۋايتىندا، بۇل قۇرال وزىندىك ماقساتىن ءتيىمدى اتقارا الىپ وتىر ما؟ مىنە، وسىنداي سيپاتتاعى ءماجىلىستىڭ تاپسىرماسىنا سايكەس، جوعارى اۋديتورلىق پالاتا اۋديت جۇرگىزگەن بولىپ شىقتى.
