Qazyǵurttaǵy bala ólimine qatysty brifing ótti
Brifingke qatysqan Qazyǵurt aýdanynyń ákimi Tólegen Telǵaraev atalǵan oqiǵaǵa qatysty shuǵyl Qazyǵurt aýdany ákimdigi janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi komissiiasy otyrysy ótkizilgenin málimdedi.
– QR BǴM-ń buiryǵy boiynsha algoritm negizinde oryn alǵan jaǵdailar týraly habarlama 3 saǵattyń ishinde tiisti bilim salasyndaǵy organdardy habardar etý kerek. Bul jaǵdaida osy buiryqtyń oryndalmaǵany anyqtaldy. Sondai-aq, komissiia otyrysynyń qorytyndysymen kináli qyzmetkerlerdiń jaýapkershiligi qaralady M.Áýezov jalpy orta mektebiniń dene shynyqtyrý pániniń muǵalimi Ábdiǵappar Esenbekov qyzmetinen ýaqytsha shettetildi. Mektep direktory Eskendir Musaqulov Tólendiulyna «Qyzmetine sáikes emestigi», direktordyń oqý isi jónindegi orynbasary Qanat Isaev Naýhanulyna «Qyzmetine sáikes emestigi», aýdandyq bilim bólimi basshysynyń orynbasary Áliia Egizek Álekbarqyzyna «Qatań sógis», aýdan ákiminiń orynbasary Serik Tursynqulov Altynbekulyna «Sógis» túrindegi sharalar jasalyndy.
Sonymen qatar, barlyq bilim berý mekemeleriniń sport zaldarynda ornalasqan qural jabdyqtarǵa, onyń ishinde shaǵyn fýtbol jáne qol doptaryna arnalǵan torly qaqpalardy bekitý jáne oqýshylar men ustazdarǵa qaýipsizdik erejelerin saqtaý sharalary júrgiziledi. Sondai-aq, mektep oqýshysynyń otbasyna tiisti kómekter kórsetiledi, – dedi Tólegen Turtaiuly.
Baspasóz máslihatynda Túrkistan oblysy adami áleýetti damytý basqarmasy basshysynyń orynbasary Ardaq Sadyqova basqarma tarapynan barlyq bilim berý uiymdaryndaǵy sport jáne basqa da inventarlardy bala qaýipsizdigine tekserý júrgizý aýdan, qala bilim bólimderine tapsyrylyp, sabaq kezinde qaýipsizdik sharalaryn saqtaý qatań tapsyrylǵandyǵyn aitty.
Brifingte Túrkistan oblysy politsiia departamentiniń tergeý basqarmasynyń basshysy Qaibar Málik atalǵan oqiǵa boiynsha sotqa deiingi tergeý amaldary júrgizilip jatqandyǵyn aitty.
– Atalmysh jait Qazyǵurt APB-niń SDTBT-ǵa QR QK-niń 141-babymen «Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tiisinshe oryndamaý» tirkeýge alyndy. Qazirgi tańda atalǵan jait boiynsha sotqa deiingi tergeý amaldary júrgizilip, oqiǵanyń tolyq mán-jaiy anyqtalýda, – dedi Qaibar Málik.
Aita keterligi, Túrkistan oblysy, Qazyǵurt aýdany, Jańabazar eldi mekenindegi M.Áýezov atyndaǵy jalpy orta mektebiniń 8 synyp oqýshysy Álihan Maqatai Talǵatuly 2019 jylǵy 5 qyrkúiek kúni saǵat 10.00 shamasynda 3-shi sabaqta (dene shynyqtyrý sabaǵy barysynda) mekteptiń sportzalynda fýtbol oiynyna arnalǵan jyljymaly qaqpa ústine qulap, oqys oqiǵa saldarynan qaitys bolǵan bolatyn.
Túrkistan oblysy ákiminiń baspasóz qyzmeti
