Sondaı-aq, sapar barysynda Qazatomónerkásip basshysy «CNNC» (China National Nuclear Corporation) dırektorlar keńesiniń tóraǵasy Sýn Sınmen (Sun Qin) jáne «CITIC GROUP Corporation» Qazaqstandaǵy bas dırektory Sýn Ianmen (Sun Yang) kezdesti.
Taraptar atom energetıkasyn damytý salasyndaǵy ózara tıimdi yntymaqtastyqtyń birqatar máselelerin talqylady. Naqtyraq aıtsaq, tabıǵı ýrandy Qazaqstannan Qytaı aýmaǵy arqyly tranzıtteý, QHR-na otyn tabletkalaryn jetkizip berý, birlese ýran óndirý, Qazaqstanda konversıalyq zaýyt salý, ıadrolyq tehnologıalardy medısınada qoldaný máseleleri qarastyryldy. Kezdesý qatysýshylary ózara tıimdi uzaq merzimdi jáne strategıalyq seriktestikke múddeli ekendikterin atap kórsetti.
Qytaılyq áriptesteriniń shaqyrýymen Asqar Jumaǵalıev Hýnan provınsıasynyń Henán qalalyq okrýgyndaǵy konversıalyq zaýytta bolyp, ýran geksaftorıdyn óndirý tehnologıasymen tanysty.
Sondaı-aq, Qazaqstannyń ulttyq atom kompanıasynyń basshysy Qytaıdyń bas ıadrolyq-energetıkalyq korporasıasy (CGNPC) bas dırektory Chjan Shanmınmen (Zhang Shanmin) kezdesti. Taraptar eki jaqty qarym-qatynastardyń túrli qyrlaryn talqylap, ózara tıimdi yntymaqtastyqty iske asyrý jónindegi talpynystarǵa joǵary baǵa berdi.
Eske sala ketsek, buǵan deıin Qazaqstanda jylý bólgish quramalar óndiretin zaýytty jobalaý jáne salý boıynsha komersıalyq sharttar týraly «Qazatomónerkásip» UAK» AQ men qytaılyq CGNPC (China General Nuclear Power Corporation) arasyndaǵy Kelisimge qol qoıylǵan bolatyn. «Úlbi metalýrgıalyq zaýyty» AQ bazasynda QHR atom elektr stansıalaryna arnalǵan otyn tabletkalaryn shyǵaratyn, jyldyq óndiristik qýaty 200 tonna JBQ ıe kásiporyn qurylýda.
«QmD» aqparat
