Premer-ministr Memleket basshysynyń atynan Toqtar Áýbákirovti 80 jasqa tolǵan mereitoiymen quttyqtady, dep habarlaidy dalanews.kz.
Premer-ministr Oljas Bektenov Memleket basshysynyń atynan qazaqtyń tuńǵysh ǵaryshkeri, Halyq qaharmany, aviatsiia general-maiory Toqtar Áýbákirovti 80 jasqa tolǵan mereitoiymen quttyqtady.
"Halqymyz ózińizdi áigili ǵaryshker, kórnekti qoǵam qairatkeri, otansúigish azamat retinde airyqsha qadirleidi. Sizdiń eńbek jolyńyz jarqyn belesterden turady. Biraz jyl kásibi ushqysh bolyp, jańa áskeri ushaqtardy synaqtan ótkizip, eren erliktiń úlgisin kórsete bildińiz. Siz zeńgir kókke kóterilgen qazaqtyń tuńǵysh ǵaryshkeri atandyńyz. Elimizdiń álem aldyndaǵy mártebesin arttyrýǵa, halyqaralyq yntymaqtastyqty nyǵaitýǵa, ulttyq aeroǵarysh, qorǵanys ónerkásibi salalaryn damytýǵa qosqan úlesińiz óte mol. Parlament Májilisiniń depýtaty bolǵan kezińizde tereń bilimińiz ben ómirlik tájiribeńizdi otandyq zańnamany jetildirý isine arnadyńyz. Aldaǵy kezeńde eseli eńbegińizdiń jemisin kórip, el-jurttyń syi-qurmetine bólene berýińizge tilektestigimdi bildiremin. Sizge myqty densaýlyq, uzaq ǵumyr, otbasyńyzǵa baq-bereke tileimin", - delingen Prezident Qasym-Jomart Toqaevtyń quttyqtaý hatynda.
Oljas Bektenov 1 shildede Qazaqstan Respýblikasynyń jańa Konstitýtsiiasy kúshine engenin atap ótti.
"Búginde Prezidentimizdiń "Ádiletti Qazaqstan" bastamasyna árdaiym qoldaý bildirip, jańa Konstitýtsiiada aiqyndalǵan ulttyń jańa sapasyn qalyptastyrý isine de aianbai atsalysyp júrsiz. Óitkeni otanshyldyq, ádildik, zań men tártip, erlik pen eńbekqorlyq siiaqty asyl qasietterdi jastardyń boiyna sińirýde alash jurtynyń adal perzenti, halqymyzdyń has batyry retinde sizdiń alatyn ornyńyz erekshe", - dep atap ótti ol.
Aita keteiik, Toqtar Áýbákirov 1946 jyly 27 shildede Qaraǵandy oblysy Qarqaraly aýdany qazirgi Toqtar aýylynda ómirge kelgen.
