Álemdik oqiǵalar kezinde ár memleket óziniń jaiyn oilaidy, soǵan sai áreket etedi. Resei-Ýkraina soǵysynyń bizge áseri týraly da osyny aitýǵa bolady.
Endeshe Ýkraina biz úshin soǵysyp jatqan joq, biraq bul soǵys bizdiń múddemizge oń áser etetini anyq. Sondyqtan «...biz úshin soǵysyp jatyr» degen sóz arzan. Ony qoiǵan jón.
Osy sózdi estip alǵasyn shyǵar Gordon áriptesimiz keshe tipti artyq siltepti. «Eger Resei Ýkrainadan buryn Qazaqstanǵa basyp kirse, onda jeńiske jeter edi. Biraq Resei bizge soǵys ashty. Biz Reseidi ábden qaljyrattyq. Endi Reseidiń Qazaqstanǵa soǵys ashar qaýmeti qalmady. Sol úshin burynǵy KSRO-de bolǵan barlyq el Ýkrainaǵa alǵys aitýy kerek» (osy maǵnada) depti.
Eger AQSh pen ujymdyq Batys qarý-jaraq bermese, aqshalai kómektespese Ýkrainanyń da aiaǵy kókten keler edi ǵoi. Iá, iá kókten keler edi.
Ýkraina ázirge aqparattyq soǵysta jeńimpaz bop tur. Óitkeni, ádildik Ýkraina jaǵynda. Reseidiń aqparattyq soǵysy bolsa, tise terekke, timese butaqqanyń keri bolyp tur.
Qudai onyń betin ármen qylsyn, eger basqynshy el Qazaqstanǵa basyp kirse álemdegi demokratiiashyl elder, onyń ishinde Reseidi jaqtyrmaityndar kómek qoldaryn sozbas deimisiń. Sozady ǵoi.
Baýyr tutqannan emes, aiaǵannan emes, ózderiniń múddeleri úshin. Baýyr tutatyn baýyrlas elder de bar ekenin aita ketken artyq bolmas. Olar týraly áńgime bólek. AQSh pen ujymdyq Batys Ýkrainaǵa júregi eljiregennen járdemdesip jatqan joq, olar da osy soǵystan óz múdelerin aiyryp alýǵa jantalasýda.
Sondyqtan Ýkrainanyń azǵantai jeńisine Gardonnyń esirip, sáýegeisip ketkenine jol bolsyn. Eshqandai da biz úshin emes, soǵyssa ózderi úshin soǵysady. Kúni erteń ne bolatynyna kóz de, kóńil de jetpeidi. Tek úmit bar. Senim tiri.
Nurlybek SAMATULY, jýrnalist.
