4 jáne 5 tamyzda «Qazaqtelekom» AQ-nyń eki qyzmetkeri óndiristegi jazataiym oqiǵalar saldarynan qaza tapty, dep habarlaidy Dalanews Halyqstan Telegram-arnasynyń derekterine silteme jasap.
Aqparatqa sáikes, alǵashqy oqiǵa 4 tamyzda Jambyl oblysy Jambyl aýdanyndaǵy Asa aýylynda bolǵan. Bailanys baǵanyn aýystyrý kezinde kran-manipýliator joǵary kerneýli elektr jelisine tiip ketip, 61 jastaǵy elektromonter ári manipýliator júrgizýshisi Azalhan Tursynovty toq soqqan. Ol oqiǵa ornynda kóz jumǵan.
Derekke qaraǵanda, atalǵan oqiǵa boiynsha sotqa deiingi tergeý bastalǵan. Jumystardyń qaýipsiz uiymdastyrylýyna jaýapty bolǵan Jambyl jelilik-tehnikalyq tsehynyń jetekshi injeneri politsiiaǵa jetkizilgen. Oqiǵaǵa bailanysty birqatar sot saraptamalary taǵaiyndalǵan.
Halyqstan málimetinshe, ekinshi jazataiym oqiǵa 5 tamyzda Qostanai oblysy Áýliekól aýdanyndaǵy Moskalevka kentinde tirkelgen. 56 jastaǵy elektromonter Múbárak Bektaýov eski aǵash bailanys baǵandaryn bólshekteý jumystaryna qatysqan. Jumys barysynda krannyń ilgegi úzilip, qulaǵan baǵana jumysshynyń basyna túsken. Ol alǵan jaraqattarynan oqiǵa ornynda qaza tapqan.
Basylymnyń jazýynsha, qyzmetkerdiń qaza bolǵanyn quqyq qorǵaý organdary men tótenshe jaǵdailar qyzmeti rastaǵan.
