Qazaqstannyń memlekettik qaryzy 2026 jyldyń basynan beri 2,1 trln teńgege ulǵaiyp, 38,5 trln teńgege jetti, dep habarlaidy Dalanews.
Qarjy ministrliginiń LS basylymyna usynǵan málimetine sáikes, qazirgi ýaqytta memlekettik qaryz kólemi 38,5 trln teńgeni quraidy. Jyl basynda bul kórsetkish 36,4 trln teńge bolǵan. Osylaisha, memlekettik qaryz 5,7%-ǵa ósken. Bul esepke jergilikti atqarýshy organdardyń úkimet aldyndaǵy ózara mindettemeleri engizilmegen.
Sonymen qatar Úkimettiń qaryzy da artqan. Eger 2026 jyldyń 1 qańtarynda ol 34,84 trln teńgeni qurasa, 1 shildedegi jaǵdai boiynsha 36,82 trln teńgege jetken.
Memlekettik qaryzdyń negizgi ósimi ishki qaryz esebinen qamtamasyz etildi. Jyl basynda ishki qaryz kólemi 26,14 trln teńge bolsa, 1 shildede 28,47 trln teńgege deiin ulǵaiyp, 8,9%-ǵa ósken.
Al syrtqy memlekettik qaryz, kerisinshe, 3,9%-ǵa azaiyp, 8,35 trln teńgeni qurady. Syrtqy mindettemelerdiń basym bóligin eýroobligatsiialar quraidy. Olardyń kólemi jyl basyndaǵy 5,01 trln teńgeden 4,81 trln teńgege deiin qysqarǵan.
Qarjy ministrliginiń málimetinshe, memlekettik jáne memleket kepildik bergen qaryzdyń, sondai-aq memleket kepilgerligi boiynsha mindettemelerdiń jiyntyq kólemi 40,9 trln teńgege jetken.
Vedomstvo buǵan deiin Qazaqstannyń memlekettik qaryzy basqarylatyn deńgeide ekenin jáne onyń el ekonomikasyna teris áseri baiqalmaitynyn málimdegen.
