Búgin QR Premer-Mınıstriniń orynbasary – Syrtqy ister mınıstri Murat Nurtileý BUU Bas Assambleıasynyń 79-shy sesıasy sheńberinde ótken Bolashaq samıtinde sóz sóıledi. Ol óz sózinde kópjaqty yntymaqtastyqtyń, BUU reformasynyń jáne klımattyń ózgerýi, ıadrolyq qaýipsizdik jáne sıfrlyq transformasıa sıaqty syn-qaterlerdi sheshýge baǵyttalǵan jahandyq kúsh-jigerdiń mańyzdylyǵyn atap ótti.
Qazaqstannyń BUU Bas hatshysynyń bastamalaryn jáne Bolashaq samıtiniń barlyq negizgi qujattaryn tolyq qoldaıtynyn rastaı otyryp, «Birikken Ulttar Uıymyna múshe barlyq eldermen jáne onyń ınstıtýttarymen bizdiń planetamyz jáne búkil adamzat úshin de jarqyn bolashaqty qamtamasyz etýde kúsh biriktirý úshin búgin Qazaqstan osynda tur», – dedi M.Nurtileý.
Mınıstr klımattyń ózgerýi jáne ıadrolyq qaýip sıaqty zamanaýı jahandyq syn-qaterlerdi eńserý úshin BUU júıesin jan-jaqty reformalaý qajet ekenin atap ótti. Bul úderiste halyqaralyq ınstıtýttardaǵy orta derjavalar men damýshy elderdiń daýystaryn kúsheıtý mańyzdy ról atqarýy tıis.
«Qazaqstan Prezıdenti Qasym-Jomart Toqaevtyń aıtýynsha, orta derjavalar men damýshy álemniń daýystary kúsheıtilip, Qaýipsizdik Keńesinde anyq estilýi tıis. Geosaıası dúrbeleń men ekonomıkalyq belgisizdik kezeńinde álemge dıplomatıa men dıalog qajet», – dep atap ótti M.Nurtileý.
QR syrtqy saıası vedomstvosynyń basshysy ádil jáne ınklúzıvti qoǵam qurýǵa baǵyttalǵan Qazaqstan Prezıdenti bastamashylyq etken ishki reformalarǵa da toqtaldy. Ólim jazasyn joıýǵa, azaptaý men turmystyq zorlyq-zombylyqqa qarsy kúreske, sondaı-aq adam quqyqtaryn qorǵaý tetikterin nyǵaıtýǵa erekshe nazar aýdaryldy.
Adam quqyqtaryn saqtaý memlekettik saıasattyń basymdyǵy bolyp qala beretinin alǵa tartyp, «Ádiletti Qazaqstandy qurý maqsatyna sáıkes elimiz ólim jazasyn alyp tastady, azaptaýǵa jáne turmystyq zorlyq-zombylyqqa múldem tózbeýshilik saıasatyn engizdi, sondaı-aq ulttyq aldyn alý tetigin nyǵaıtty», – dep atap ótti M.Nurtileý.
Ortalyq Azıa temperatýranyń joǵarylaýy, muzdyqtardyń erýi jáne shóleıttený sıaqty klımattyń ózgerý qaýpine tap bolýda. Osy syn-qaterlerge jaýap retinde Qazaqstan 2026 jyly BUU-nyń Birinshi óńirlik klımattyq samıtin ótkizýdi josparlap otyr jáne Ornyqty damý maqsattaryn oryndaý jónindegi úılestirýdi kúsheıtý maqsatynda Ortalyq Azıa men Aýǵanstan úshin BUU-nyń Ornyqty damý jónindegi óńirlik ortalyǵyn qurýdy usyndy.
Qazaq dıplomaty sıfrlyq transformasıa salasynda 2030 Kún tártibine qol jetkizýdegi tehnologıalardyń rólin atap ótti jáne Azıa-Tynyq muhıty óńirindegi sıfrlyq alshaqtyqty joıýǵa yqpal etetin BUU ATMEÁK Sıfrlyq sheshimder ortalyǵyn qurýǵa bastamashy boldy.
Iadrolyq synaqtardyń qaıǵyly tájirıbesi bar Qazaqstan halyqaralyq ıadrolyq qarýsyzdanýdy ilgeriletýde belsendi ról atqarýda. M.Nurtileý halyqaralyq qaýymdastyqty bolashaqta ıadrolyq apattyń aldyn alý boıynsha birlesken kúsh-jigerge shaqyrdy.
Sóz sońynda QR SİM basshysy BUU Jarǵysy men halyqaralyq quqyq qaǵıdattaryna negizdelgen álemge balama joq ekenin atap ótti. Ol álemdik qaýymdastyqty ashyq dıalog pen kópjaqty yntymaqtastyqqa shaqyrdy.
Mınıstr Qazaqstan Bolashaq samıtinde qabyldanǵan úsh mańyzdy qujatqa: Bolashaq úshin jasalǵan paktige, Jańa sıfrlyq shartqa jáne Bolashaq urpaq týraly deklarasıaǵa tolyq qoldaý bildirgenin aıtty. Bul qujattar kópjaqty yntymaqtastyqty nyǵaıtýǵa jáne klımattyń ózgerýin, tehnologıalyq transformasıany jáne qaýipsizdik qaterlerin qosa alǵanda, qazirgi zamannyń ekzıstensıaldy qaterlerin sheshý úshin tıimdi jahandyq júıeni qurýǵa baǵyttalǵan.
