بۇگىن ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ بۇۇ باس اسسامبلەياسىنىڭ 79-شى سەسسياسى شەڭبەرىندە وتكەن بولاشاق سامميتىندە ءسوز سويلەدى. ول ءوز سوزىندە كوپجاقتى ىنتىماقتاستىقتىڭ، بۇۇ رەفورماسىنىڭ جانە كليماتتىڭ وزگەرۋى، يادرولىق قاۋىپسىزدىك جانە سيفرلىق ترانسفورماسيا سياقتى سىن-قاتەرلەردى شەشۋگە باعىتتالعان جاھاندىق كۇش-جىگەردىڭ ماڭىزدىلىعىن اتاپ ءوتتى.
قازاقستاننىڭ بۇۇ باس حاتشىسىنىڭ باستامالارىن جانە بولاشاق ءسامميتىنىڭ بارلىق نەگىزگى قۇجاتتارىن تولىق قولدايتىنىن راستاي وتىرىپ، «بىرىككەن ۇلتتار ۇيىمىنا مۇشە بارلىق ەلدەرمەن جانە ونىڭ ينستيتۋتتارىمەن ءبىزدىڭ پلانەتامىز جانە بۇكىل ادامزات ءۇشىن دە جارقىن بولاشاقتى قامتاماسىز ەتۋدە كۇش بىرىكتىرۋ ءۇشىن بۇگىن قازاقستان وسىندا تۇر»، – دەدى م.نۇرتىلەۋ.
مينيستر كليماتتىڭ وزگەرۋى جانە يادرولىق ءقاۋىپ سياقتى زاماناۋي جاھاندىق سىن-قاتەرلەردى ەڭسەرۋ ءۇشىن بۇۇ جۇيەسىن جان-جاقتى رەفورمالاۋ قاجەت ەكەنىن اتاپ ءوتتى. بۇل ۇدەرىستە حالىقارالىق ينستيتۋتتارداعى ورتا دەرجاۆالار مەن دامۋشى ەلدەردىڭ داۋىستارىن كۇشەيتۋ ماڭىزدى ءرول اتقارۋى ءتيىس.
«قازاقستان پرەزيدەنتى قاسىم-جومارت توقايەۆتىڭ ايتۋىنشا، ورتا دەرجاۆالار مەن دامۋشى الەمنىڭ داۋىستارى كۇشەيتىلىپ، قاۋىپسىزدىك كەڭەسىندە انىق ەستىلۋى ءتيىس. گەوساياسي دۇربەلەڭ مەن ەكونوميكالىق بەلگىسىزدىك كەزەڭىندە الەمگە ديپلوماتيا مەن ديالوگ قاجەت»، – دەپ اتاپ ءوتتى م.نۇرتىلەۋ.
ق ر سىرتقى ساياسي ۆەدومستۆوسىنىڭ باسشىسى ءادىل جانە ينكليۋزيۆتى قوعام قۇرۋعا باعىتتالعان قازاقستان پرەزيدەنتى باستاماشىلىق ەتكەن ىشكى رەفورمالارعا دا توقتالدى. ءولىم جازاسىن جويۋعا، ازاپتاۋ مەن تۇرمىستىق زورلىق-زومبىلىققا قارسى كۇرەسكە، سونداي-اق ادام قۇقىقتارىن قورعاۋ تەتىكتەرىن نىعايتۋعا ەرەكشە نازار اۋدارىلدى.
ادام قۇقىقتارىن ساقتاۋ مەملەكەتتىك ساياساتتىڭ باسىمدىعى بولىپ قالا بەرەتىنىن العا تارتىپ، «ادىلەتتى قازاقستاندى قۇرۋ ماقساتىنا سايكەس ەلىمىز ءولىم جازاسىن الىپ تاستادى، ازاپتاۋعا جانە تۇرمىستىق زورلىق-زومبىلىققا مۇلدەم توزبەۋشىلىك ساياساتىن ەنگىزدى، سونداي-اق ۇلتتىق الدىن الۋ تەتىگىن نىعايتتى»، – دەپ اتاپ ءوتتى م.نۇرتىلەۋ.
ورتالىق ازيا تەمپەراتۋرانىڭ جوعارىلاۋى، مۇزدىقتاردىڭ ەرۋى جانە شولەيتتەنۋ سياقتى كليماتتىڭ وزگەرۋ قاۋپىنە تاپ بولۋدا. وسى سىن-قاتەرلەرگە جاۋاپ رەتىندە قازاقستان 2026 جىلى بۇۇ-نىڭ ءبىرىنشى وڭىرلىك كليماتتىق ءسامميتىن وتكىزۋدى جوسپارلاپ وتىر جانە ورنىقتى دامۋ ماقساتتارىن ورىنداۋ جونىندەگى ۇيلەستىرۋدى كۇشەيتۋ ماقساتىندا ورتالىق ازيا مەن اۋعانستان ءۇشىن بۇۇ-نىڭ ورنىقتى دامۋ جونىندەگى وڭىرلىك ورتالىعىن قۇرۋدى ۇسىندى.
قازاق ديپلوماتى سيفرلىق ترانسفورماسيا سالاسىندا 2030 كۇن تارتىبىنە قول جەتكىزۋدەگى تەحنولوگيالاردىڭ ءرولىن اتاپ ءوتتى جانە ازيا-تىنىق مۇحيتى وڭىرىندەگى سيفرلىق الشاقتىقتى جويۋعا ىقپال ەتەتىن بۇۇ اتمەاك سيفرلىق شەشىمدەر ورتالىعىن قۇرۋعا باستاماشى بولدى.
يادرولىق سىناقتاردىڭ قايعىلى تاجىريبەسى بار قازاقستان حالىقارالىق يادرولىق قارۋسىزدانۋدى ىلگەرىلەتۋدە بەلسەندى ءرول اتقارۋدا. م.نۇرتىلەۋ حالىقارالىق قاۋىمداستىقتى بولاشاقتا يادرولىق اپاتتىڭ الدىن الۋ بويىنشا بىرلەسكەن كۇش-جىگەرگە شاقىردى.
ءسوز سوڭىندا ق ر ءسىم باسشىسى بۇۇ جارعىسى مەن حالىقارالىق قۇقىق قاعيداتتارىنا نەگىزدەلگەن الەمگە بالاما جوق ەكەنىن اتاپ ءوتتى. ول الەمدىك قاۋىمداستىقتى اشىق ديالوگ پەن كوپجاقتى ىنتىماقتاستىققا شاقىردى.
مينيستر قازاقستان بولاشاق سامميتىندە قابىلدانعان ءۇش ماڭىزدى قۇجاتقا: بولاشاق ءۇشىن جاسالعان پاكتىگە، جاڭا سيفرلىق شارتقا جانە بولاشاق ۇرپاق تۋرالى دەكلاراسياعا تولىق قولداۋ بىلدىرگەنىن ايتتى. بۇل قۇجاتتار كوپجاقتى ىنتىماقتاستىقتى نىعايتۋعا جانە كليماتتىڭ وزگەرۋىن، تەحنولوگيالىق ترانسفورماسيانى جانە قاۋىپسىزدىك قاتەرلەرىن قوسا العاندا، قازىرگى زاماننىڭ ەكزيستەنسيالدى قاتەرلەرىن شەشۋ ءۇشىن ءتيىمدى جاھاندىق جۇيەنى قۇرۋعا باعىتتالعان.
