Qasanovtar otbasy Qazaqstan Damý Banki arqyly jeńildik qarastyrylǵan qomaqty qarjyny tarta otyryp, Almatyda eki qonaq úi salýdy josparlap otyr. Bul týraly bank saitynda paida bolǵan tiisti qujattardan belgili boldy, dep habarlaidy Dalanews.kz.
Olardyń biri - Hilton qonaq úiin salýdy qarastyrady, qazirdiń ózinde bul rette nesie maquldanǵan. Meliora by Vignette Collection qonaqúii boiynsha áli de banktik saraptama júrgizilýde.
Jalpy, Qasanovtar otbasy Qazaqstandaǵy 50 bai adamdardyń qatarynan bolady. Olarǵa Almatynyń vizit kartasy bolyp tabylatyn - "Qazaqstan" (1977 jyly salynǵan), sondai-aq Ambassador Hotel Almaty qonaq úileri men Premier Alatau qonaq úidi de qamtityn biznes ortalyǵy tiesili. Qasanovtar otbasy Túrkiiadaǵy bes juldyzdy Intercontinental Istanbul oteliniń de egesi bolyp tabylady.
Negizinen, 2024 jyly mamyrda Almatydaǵy Hilton-dy salýshy - Sensata kompaniiasynyń aty búkil elge jariia boldy. Onda da áielin asa qatygezdikpen óltirdi dep aiyptalyp, 24 jylǵa sottalǵan burynǵy ulttyq ekonomika ministri Qýandyq Bishimbaevtyń soty kezinde. Sot barysynda marqum Saltanat Núkenovanyń aǵasy Áitim Amangeldi Sensata kompaniiasyn Bishimbaevtar otbasymen bailanystyrǵan. Al 2024 jyly 1 sáýirde qurylys kompaniiasy Bishimbaevtyń Sensata Group-qa túk qatysy joq ekenin resmi túrde málimdedi.
Sol kezde jýrnalister qujattardy aqtara otyryp, bul maqsatqa Qazaqstan Damý Bankinen "Star Zem" JShS nesie suraǵanyn anyqtaǵan. Al bul JShS Hakan Qasanovqa tiesili bolyp shyqty. Al ol Almaty oblysy máslihatynyń burynǵy depýtaty Úsen Qasanovtyń balasy eken. Al Úsen men onyń úlken aǵasy Ziiatdin 2019 jyldan bastap Qazaqstandaǵy eń bai kásipkerler tizimine enedi. Forbes jýrnalynyń baǵalaýynsha, aǵaiyndy Qasanovtardyń bailyǵy 140 mln dollarǵa baǵalanady. Qonaqúilerden bólek bul otbasy aýylsharýashylyǵy jáne qurylys materialdaryna qatysty birneshe JShS-ǵa ielik etedi.
Beiresmi derekterge sáikes, 16 qabattan turatyn Hilton halyqaralyq meimanhana jelisi Almatynyń tarihi bóliginen oryn teppek, iaǵni 28 panfilovshylar parki mańynan, Qaldaiaqov pen Qazybek bi kóshesi qiylysyndaǵy burynǵy Qurylys materialdary ministrligi, keiinnen Qazaqstan arhitektorlar odaǵy ornalasqan ǵimarat ornynda.
Aita ketsek, bilik ókilderiniń aitýynsha, qańtar oqiǵasy kezinde Almatydaǵy "Qazaqstan" qonaqúii tártipsizdikti uiymdastyrǵan "búlikshilerdiń komandalyq shtaby" ornalasqan jer bolǵan.
