Qazaqstannyń bank sektoryna iri arab banki kelmek. Qarjy naryǵyn retteý jáne damytý agenttigi Abu Dhabi Commercial Bank-ke elde enshiles bank ashýǵa ruqsat berdi, dep habarlaidy Dalanews.kz.
Jańa qurylym tolyqqandy ámbebap litsenziiamen jumys isteidi. Iske qosylǵannan keiin ol naryqta barlyq negizgi bank qyzmetin usyna alady.
Abu Dhabi Commercial Bank - BAÁ-niń eń iri bankteriniń biri. Aktivteri 210 mlrd dollardan asady, Fitch agenttiginen A+ reitingi bar. Qazaqstandaǵy enshiles banktiń jalǵyz aktsioneri osy bas kompaniia bolady. Demek, jańa uiymnyń kapitaly, strategiiasy men operatsiialyq qoldaýyn tolyqtai sol qamtamasyz etedi.
Sarapshylar bul qadamdy mańyzdy signal dep baǵalaidy. Sebebi Qazaqstannyń bank sektoryna iri resýrsy men halyqaralyq tájiribesi bar syrtqy oiynshy kelip otyr.
Sonymen qatar, jańa bank dástúrli qyzmettermen qatar, "islamdyq tereze" arqyly islamdyq qarjylandyrýdy damytýdy josparlap otyr. Qazaqstan úshin bul baǵyt keń taralmaǵandyqtan, jańa qatysýshyny ózgelerden ereksheleýi múmkin.
Aita keteiik, qazir tek enshiles bank ashýǵa ruqsat berilgen. Soǵan qaramastan, bul qadamnyń ózi Qazaqstannyń qarjy sektory úshin eleýli oqiǵa sanalady.
