Ata Zańdaǵy Qazaqstannyń birtutastyǵy men aýmaǵynyń bólinbeitini týraly norma ózgerissiz qalady. Konstitýtsiialyq reformalar jónindegi komissiia áleýmettik jelide taraǵan qaýesetterdi resmi túrde joqqa shyǵardy, dep habarlaidy Dala News.
Búgin ótken komissiianyń tórtinshi otyrysynda Konstitýtsiialyq Sot tóraǵasynyń orynbasary Baqyt Nurmuhanov Konstitýtsiiaǵa belgili bir aýmaqtarǵa qarjy salasynda arnaiy quqyqtyq rejim engizý nemese «jyldam damý qalalary» formatyndaǵy aimaqtardy qurý múmkindigin qarastyratyn normany engizý usynylyp otyrǵanyn aitty.
Onyń sózinshe, bul bastama eń aldymen Astanadaǵy Halyqaralyq qarjy ortalyǵynyń qyzmetine jáne Alataý qalasyn damytýǵa qatysty. Usynylǵan tetik respýblikanyń ekonomikalyq damýyn jedeldetýge baǵyttalǵan.
Sonymen birge, Baqyt Nurmuhanov bul ózgerister Qazaqstannyń birtutastyǵy men aýmaǵynyń bólinbeitindigine eshqandai áser etpeitinin atap ótti.
«Memlekettiń birtutastyǵy, Qazaqstan aýmaǵynyń tutastyǵy, bólinbeitindigi jáne oǵan qol suǵylmaýshylyǵy týraly norma ózgerissiz qalady», dedi ol.
Eske sala keteiik, buǵan deiin komissiia otyrysynda aitylǵan usynys áleýmettik jelide ártúrli túsindirilip, qoǵamda alańdaýshylyq týdyrǵan bolatyn. Búgin Konstitýtsiialyq komissiia bul máselege naqty jaýap berip, núktesin qoidy: Konstitýtsiiadaǵy Qazaqstannyń birtutastyǵy men aýmaǵynyń bólinbeitini týraly norma ózgermeidi.
