اتا زاڭداعى قازاقستاننىڭ ءبىرتۇتاستىعى مەن اۋماعىنىڭ بولىنبەيتىنى تۋرالى نورما وزگەرىسسىز قالادى. كونستيتۋسيالىق رەفورمالار جونىندەگى كوميسسيا الەۋمەتتىك جەلىدە تاراعان قاۋەسەتتەردى رەسمي تۇردە جوققا شىعاردى، دەپ حابارلايدى Dala News.
بۇگىن وتكەن كوميسسيانىڭ ءتورتىنشى وتىرىسىندا كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ كونستيتۋسياعا بەلگىلى ءبىر اۋماقتارعا قارجى سالاسىندا ارنايى قۇقىقتىق رەجيم ەنگىزۋ نەمەسە «جىلدام دامۋ قالالارى» فورماتىنداعى ايماقتاردى قۇرۋ مۇمكىندىگىن قاراستىراتىن نورمانى ەنگىزۋ ۇسىنىلىپ وتىرعانىن ايتتى.
ونىڭ سوزىنشە، بۇل باستاما ەڭ الدىمەن استاناداعى حالىقارالىق قارجى ورتالىعىنىڭ قىزمەتىنە جانە الاتاۋ قالاسىن دامىتۋعا قاتىستى. ۇسىنىلعان تەتىك رەسپۋبليكانىڭ ەكونوميكالىق دامۋىن جەدەلدەتۋگە باعىتتالعان.
سونىمەن بىرگە، باقىت نۇرمۇحانوۆ بۇل وزگەرىستەر قازاقستاننىڭ ءبىرتۇتاستىعى مەن اۋماعىنىڭ بولىنبەيتىندىگىنە ەشقانداي اسەر ەتپەيتىنىن اتاپ ءوتتى.
«مەملەكەتتىڭ ءبىرتۇتاستىعى، قازاقستان اۋماعىنىڭ تۇتاستىعى، بولىنبەيتىندىگى جانە وعان قول سۇعىلماۋشىلىعى تۋرالى نورما وزگەرىسسىز قالادى»، دەدى ول.
ەسكە سالا كەتەيىك، بۇعان دەيىن كوميسسيا وتىرىسىندا ايتىلعان ۇسىنىس الەۋمەتتىك جەلىدە ءارتۇرلى ءتۇسىندىرىلىپ، قوعامدا الاڭداۋشىلىق تۋدىرعان بولاتىن. بۇگىن كونستيتۋسيالىق كوميسسيا بۇل ماسەلەگە ناقتى جاۋاپ بەرىپ، نۇكتەسىن قويدى: كونستيتۋسياداعى قازاقستاننىڭ ءبىرتۇتاستىعى مەن اۋماعىنىڭ بولىنبەيتىنى تۋرالى نورما وزگەرمەيدى.
