Qazaqstannan deportatsiialanǵan 25 jastaǵy IT-maman Aleksandr Kachkýrkin Reseide memleketke opasyzdyq jasady degen aiyppen qamaýǵa alyndy. Bul týraly 1 aqpanda "Pervyi otdel" quqyq qorǵaý jobasy málimdedi, dep habarlaidy Dalanews.kz dw.com-ǵa siltep.
Quqyq qorǵaýshylardyń málimetinshe, qańtardyń aiaǵynda Almaty politsiiasy Kachkýrkinge qatysty eki ákimshilik hattama toltyrǵan: ruqsat etilmegen jerden jol kesip ótkeni jáne jabyq jerde kalian shekkeni úshin. Sonyń negizinde sot ony "Qazaqstan Respýblikasynyń zańdary men egemendigin qurmettemeýine" bailanysty elden shyǵarý týraly sheshim qabyldaǵan.
Reseige ushyp kelgen boida Kachkýrkin ushaqtan túse sala ustalyp, sotqa jetkizilgen. 31 qańtarda TASS agenttigi Máskeýdiń Meshan aýdandyq soty memleketke opasyzdyq týraly qylmystyq is aiasynda Kachkýrkindi tergeý izoliatoryna qamaýǵa alǵanyn habarlady. Sot otyrysy jabyq rejimde ótken.
Quqyq qorǵaýshylardyń aitýynsha, qylmystyq iske Ýkrainaǵa jiberilgen aqsha aýdarymdary sebep bolýy múmkin. Bul bap boiynsha eń aýyr jaza - ómir boiyna bas bostandyǵynan aiyrý. Alaida Kachkýrkinniń aiypty moiyndaǵany nemese aýdarymdar deregin rastaǵany jóninde aqparat joq.
Aleksandr Kachkýrkin - Ýkraina azamaty, Qyrymda týǵan. Ol saiasi sebeptermen Qazaqstanǵa kóship, Almatyda IT-injener jáne ázirleýshi bolyp jumys istegen. Kei derekterge sáikes ol OpenAI kompaniiasymen de yntymaqtastyq ornatqan.
