Májilis depýtaty Erlan Sairov Qazaqstanda vitse-prezident institýtyn engizýdiń mańyzyn túsindirip, bul bastama konstitýtsiialyq reformanyń negizgi elementteriniń biri ekenin aitty, dep habarlaidy Dalanews.kz.
Onyń sózinshe, vitse-prezident laýazymyn engizý arqyly prezidenttik biliktiń bir bóligi taǵy bir saiasi tulǵamen bólisiledi.
«Bul – osy konstitýtsiialyq reformany qoldaityn adam. Prezident saiasi institýt retinde óz ókilettiginiń bir bóligin taǵy bir saiasi tulǵamen bólisedi. Saiasi leksikada bul – saiasi diversifikatsiia», – dedi depýtat.
Erlan Sairovtyń aitýynsha, mundai model saiasi sheshimderdi bir adamnyń emes, ujymdyq formatta qabyldaýǵa jol ashady.
«Iaǵni saiasi sheshimder qabyldanatyn kezde, ol sheshimder endi bir ǵana tulǵadan shyqpaidy, olar ujymdyq sheshimge ainalady. Bul – birinshisi», – dedi ol.
Depýtat ekinshi mańyzdy sebep retinde qazirgi geosaiasi jaǵdaidy atady. Onyń pikirinshe, halyqaralyq ahýal kún saiyn kúrdelenip bara jatqan kezeńde syrtqy saiasatta ikemdi tásilder qajet.
«Búgin geosaiasi jaǵdai kún saiyn kúrdelenip, ýshyǵyp keledi. Sondyqtan basqa memlekettermen dialogta chelnoch diplomatiiasynyń ádistemesi qajet. Iaǵni iri derjavalarmen jáne ózge eldermen qarym-qatynastyń jekelegen tustaryn rettep otyratyn adam kerek», – dedi Sairov.
Onyń aitýynsha, vitse-prezident prezidentpen teń dárejede eldiń ishki jáne syrtqy saiasatyn aiqyndaýǵa qatysyp, memleket basshysyna onyń saiasatyn júzege asyrýda kómek kórsetedi.
«Bul – prezidentpen qatar ishki jáne syrtqy saiasatty aiqyndaityn, prezidentke óz saiasatyn júrgizýde kómektesetin saiasi tulǵa. Qazirgi óte kúrdeli geosaiasi kezeńde bul asa mańyzdy ári qajet», – dep túiindedi depýtat.
1993 jyldaǵy tájiribe qaitalana ma?
Suraqqa jaýap bere otyryp, Erlan Sairov 1993 jylǵy tájiribemen salystyrýdyń orynsyz ekenin aitty. Ol jańa Konstitýtsiia jobasynda negizgi tetikterdiń túbegeili ózgergenin atap ótti.
«Biz bir aqiqatty túsinýimiz kerek. Jańa usynylyp otyrǵan Konstitýtsiia redaktsiiasynda kez kelgen ózgeris tek búkilhalyqtyq referendým arqyly ǵana engiziletini jazylǵan», – dedi ol.
Depýtattyń sózinshe, bul norma qabyldanǵan jaǵdaida Konstitýtsiiany keiin ońai ózgertý múmkin bolmaidy.
«Iaǵni osy Konstitýtsiia qabyldanǵannan keiin oǵan qandai da bir ózgeris engizý is júzinde múmkin bolmaidy», – dedi Erlan Sairov.
