Qazaqstanda engizilýi tıis vıse-prezıdent ınstıtýtynda «áıel vıse-prezıdent» senarıi de qarastyrylǵan deıdi, DALA INSIDE derekkózi. Onyń aıtýynsha, úmitkerler short-tiziminde Prezıdent Ákimshiligi jetekshisiniń orynbasary Ásel Janasova men Májilis vıse-spıkeri Dánıa Espaeva tur.
«Vıse-prezıdenttiń memleket atynan halyqaralyq forýmdarǵa qatysyp, sheteldik delegasıalarmen kezdesý ótkizý fýnksıasyna Ásel Jubanyshqyzy men Dánıa Mádıqyzy da týra keledi. Al Parlament, ıaǵnı bolashaq Quryltaımen tyǵyz jumys isteýde Dánıa Espaevanyń tájirıbesi mol. Biraq Prezıdent qyzmetin ýaqytsha atqarý qajettiligi týyndap qalsa, onda Ásel Janasovanyń ekonomıkalyq biliktiligi sál joǵaryraq. Jáne ol logıstıkalyq strategıany jaqsy meńgergen», - deıdi, derekkóz.
Ásel Janasova jas jáne energıasy kóp. Al Dánıa Espaeva parlamentarızm isinde mol tájirıbe jınaǵan. Bul rette jas energıa men mol tájirıbe arasynda tańdaý jasaýǵa týra keledi. Biraq dál qazir «áıel vıse-prezıdent» senarıi basty varıant bolyp qarastyrylmaǵan. Derekkóz sózinshe, negizgi short-paraqta Senat spıkeri Máýlen Áshimbaev, Memlekettik keńesshi Erlan Qarın men Májilis tóraǵasy Erlan Qoshanov bar. Endi Prezıdenttiń aldynda kúrmeýi qıyn dılem paıda boldy.
«Úshtiktiń biri vıse-prezıdent bolsa, teń balans ustaý úshin ekinshi tulǵany Quryltaı spıkerligine, úshinshi qaıratkerdi Úkimet basqarýǵa jiberý týraly sheshim qabyldanýy múmkin», - deıdi, derekkóz.
Ekonomıkalyq reformalardyń negizgi kartınasyn aıqyndap alǵan Qazaqstan endi saıası transformasıany bastap ketti. Ol shamamen 2027 jyly aıaqtalady dep kútilýde.
