Aq úidiń baspasóz hatshysy Károlin Levitt Jo Baiden ákimshiliginiń federaldyq qarajatty tiimsiz jumsaǵanyn málimdedi, dep habarlaidy Dalanews.kz.
Onyń aitýynsha, burynǵy prezidenttiń komandasy (demokrattar, red.) Qazaqstandaǵy “dezinformatsiiamen kúres” dep sipattalǵan jobaǵa 4,5 mln dollar bólgen.
Karolin Levitt bul aqparatty Aq úidegi brifingte jariia etti. Ol sonymen birge Baidenniń komandasy Gýatemalada jynys aýystyrýǵa 2 mln dollar, Iraktaǵy “Sezam kóshesi” shoýyna 20 mln dollar jáne Egipettegi týrizmdi qoldaýǵa 6 mln dollar baǵyttaǵanyn aitty.
Levitt “Baiden ákimshiligi muny qandai negizge súienip jasaǵanyn túsindirmeidi” dep synady.
“Olar osyndai shyǵystardy kúrt qysqartyp jatqan prezident Tramptyń bastamasyna bulqan-talqan bolyp jatyr. Al shyn máninde, adamdarǵa naqty kómek kerek jerlerge (mysaly, Soltústik Karolina men Kaliforniia) múlde qoldaý kórsetilmegen, – dedi Levitt.
Qazaqstandaǵy “dezinformatsiiamen kúres” jobasynyń naqty mazmuny týraly baspasóz hatshysy eshqandai derek keltirmedi. Tek bul bastamanyń jalpy quny 4,5 mln dollardy quraitynyn jetkizdi.
Levitt federaldyq shyǵyndardy muqiiat baqylaý qajet ekenin aityp, Baiden ákimshiliginiń budan ózge de qajetsiz jobalarǵa qarjy bólgenin jáne onyń tizimin aldaǵy ýaqytta jariia eterin málimdedi.
Qazirgi prezident Donald Tramp inaýgýratsiiadan beri biýdjet únemdeý máselesin jii kóterip keledi. Onyń ainalasyndaǵy adamdar kóptegen halyqaralyq baǵdarlamany qysqartý nemese múldem toqtatý kerek degen ustanymda.
