Qazaqstanda bazalyq mólsherlemeniń tómendeýinen keiin ekinshi deńgeili bankter depozitterdiń sharttaryn qaita qarai bastady. Salymdar boiynsha syiaqy mólsherlemesin tómendetetinin alǵashqylardyń biri bolyp Home Credit Bank pen Freedom Bank Kazakhstan jariialady, dep habarlaidy dalanews.kz.
Home Credit Bank 1 tamyzdan bastap birqatar depozitter men depozittik sertifikattar boiynsha syiaqy mólsherlemesin azaitatynyn habarlady.
Atap aitqanda, úsh ailyq «Sberegatelnyi Hoým+» depoziti jáne VIP klientterge arnalǵan alty ailyq «Sberegatelnyi Hoým+» salymy boiynsha nominaldy mólsherleme 18,65%-dan 18,24%-ǵa tómendeidi. Al jyldyq tiimdi syiaqy mólsherlemesi (JTSM) 20,50%-dan 20,00%-ǵa deiin azaiady.
Sonymen qatar bank «Standartnyi 2.0» depozittik sertifikattarynyń da tabystylyǵyn qysqartady. 12 ailyq sertifikat boiynsha mólsherleme 19,5%-dan 19,0%-ǵa, al eki jyldyq sertifikat boiynsha 18,75%-dan 18,25%-ǵa tómendeidi. Barlyq jaǵdaida tómendeý kólemi 0,5 paiyzdyq tarmaqty quraidy. Qalǵan sharttar ózgerissiz qalady.
Depozitter shartyn ózgertetinin Freedom Bank Kazakhstan ta málimdedi.
6 tamyzdan bastap jańadan ashylatyn jáne merzimi uzartylatyn úsh ailyq «Strategiia» depoziti boiynsha nominaldy mólsherleme 18,09%, al JTSM 19,50% bolady.
Al 7 tamyzdan bastap «Kapital» depozitiniń sharttary ózgeredi. Bir ailyq salym boiynsha nominaldy mólsherleme 16,95%, al JTSM 18,00% deńgeiinde belgilenedi.
Buǵan deiin Altyn Bank ta depozitter boiynsha syiaqy mólsherlemesi tómendeitinin habarlaǵan bolatyn, alaida naqty kórsetkishterdi jariialamaǵan.
Bankterdiń mundai sheshimi Ulttyq banktiń aqsha-kredit saiasatyn jumsartýynan keiin qabyldandy. 24 shildede retteýshi bazalyq mólsherlemeni 17%-dan 16,75%-ǵa deiin tómendetti. Bul maýsym aiyndaǵy sheshimnen keiingi qatarynan ekinshi tómendeý boldy. Maýsymda bazalyq mólsherleme uzaq ýaqyttan beri alǵash ret birden 1 paiyzdyq tarmaqqa qysqartylyp, 17% deńgeiine túsken edi.
Ulttyq bank bul sheshimdi infliatsiianyń baiaýlaýymen túsindirdi. Maýsym aiynda jyldyq infliatsiia 10,3%-dy qurap, mamyrdaǵy 10,4%-dan tómendedi. Osylaisha baǵa ósiminiń báseńdeýi toǵyzynshy ai qatarynan jalǵasyp otyr.
Sonymen birge retteýshi aldaǵy sheshimder infliatsiianyń ózgerisine, tutynýshylyq suranysqa jáne biýdjettik saiasattyń oryndalýyna bailanysty qabyldanatynyn atap ótti.
Bazalyq mólsherleme tómendegenimen, ekonomikadaǵy aqsha-kredit sharttary áli de qatań kúiinde qalyp otyr. Qazaqstan qarjygerleri qaýymdastyǵynyń (QQQ) sarapshylarynyń málimetinshe, biylǵy alǵashqy jartyjyldyqta naqty paiyzdyq mólsherleme 5,7%-dan 6,7%-ǵa deiin ósken. Buǵan infliatsiianyń paiyzdyq mólsherlemeden jyldamyraq baiaýlaýy sebep bolǵan.
Qaýymdastyq deregine sáikes, bul úrdis ekonomikada da baiqala bastady. Qańtar–mamyr ailarynda bólshek saýda ósimi ótken jyldyń osy kezeńindegi 6,5%-dan 3,6%-ǵa deiin baiaýlaǵan. Al tutynýshylyq nesieler berý kólemi byltyrǵy sáikes kezeńdegi 17,8% ósimnen keiin biyl 8%-ǵa qysqarǵan.
Sarapshylardyń pikirinshe, jyldyń alǵashqy jartysynda depozittik naryqta qorlandyrý quny aitarlyqtai ózgermegen, bul mólsherlemelerdiń burynǵy belsendi ósiminen keiin turaqtanǵanyn kórsetedi. Al bankterdiń tamyz aiynan bastap depozitterdiń tabystylyǵyn tómendetýi – Ulttyq banktiń shildedegi sheshiminiń bólshek klientterge áser etken alǵashqy aiqyn belgisi bolýy múmkin.
