Qazaqstan quramasy Japoniiada ótip jatqan Aziada-2026 oiyndarynyń alǵashqy jarys kúnin tórt altyn jáne eki qola medalmen aiaqtady, dep habarlaidy dalanews.kz.
El qorjynyna Rinata Sultanova, Aleksei Lýtsenko, Jolaman Bigabyl jáne Sofia Berýltseva altyn, Arlan Jańabai men qazirgi bessaiystan erler quramasy qola júlde saldy, dep habarlaidy Dala News.
Alǵashqy altyndy veloshabandoz Rinata Sultanova jeńip aldy. Ol áielder arasyndaǵy jekelei ýaqytqa jarysta 36:23.72 nátije kórsetip, márege birinshi bolyp jetti. Qytailyq Chjan Hao kúmis, Ońtústik Koreia ókili Sin Djiyn qola medal ielendi. Bul — Qazaqstannyń qazirgi Aziadadaǵy alǵashqy altyny.
«Alǵashqy altyn medaldiń orny árqashan erekshe. Bul jeńis búkil ulttyq quramaǵa jaqsy serpin beredi», — dedi Týrizm jáne sport ministri Erbol Myrzabosynov.
Ekinshi altyndy qazaqstandyq Aleksei Lýtsenko tasjoldaǵy jekelei ýaqytqa jarysta jeńip aldy. Ol qashyqtyqty 41:24.05 ýaqytta baǵyndyrdy. Ekinshi oryn japoniialyq Siýnsýke Imamýraǵa, úshinshi oryn mońǵoliialyq Jambaliamts Sainbaiarǵa buiyrdy.
Bul Lýtsenkonyń Aziia oiyndaryndaǵy besinshi altyny boldy. Ol jekelei ýaqytqa jarysta tórtinshi ret qatarynan chempion atanyp otyr. Buǵan deiin sportshy 2014, 2018 jáne 2022 jyldardaǵy Aziadada osy distsiplinadan top jarǵan.
Qazaqstannyń úshinshi altynyn karateshi Jolaman Bigabyl ielendi. 55 kelige deiingi salmaqta óner kórsetken sportshy finalda Ózbekstan ókili Hýmoiýnmirza Halimovty 9:1 esebimen jeńdi.
Taǵy bir altyn medal Sofia Berýltsevanyń enshisinde. Qazaqstandyq karateshi 68 keliden joǵary salmaqta jeńimpaz atandy. Bul onyń Aziia oiyndaryndaǵy qatarynan ekinshi altyny. Buǵan deiin Berýltseva Hanchjoýdaǵy Aziadada da osy salmaqta chempion bolǵan.
Alǵashqy qola medaldi triatlonshy Arlan Jańabai jeńip aldy. Ol erler arasyndaǵy jekelei jarysty 53:11 nátijesimen aiaqtap, úshinshi orynǵa jaiǵasty. Japoniialyq Hodzio Takými altyn, Qytai ókili Chjan Sijýi kúmis medal aldy.
Qazirgi bessaiystan Qazaqstan erler quramasy da qola júldege ie boldy. Komanda sapynda Tihon Varehin, Temirlan Abdraimov jáne Lev Chývashov óner kórsetti. Jeke esepte eń joǵary nátijeni Abdraimov kórsetip, jetinshi oryn aldy. Qazaqstan bul sport túrinen Aziada júldesine 16 jyldan keiin qaita oraldy.
Osylaisha, alǵashqy jarys kúniniń qorytyndysy boiynsha Qazaqstan quramasynyń qorjynynda tórt altyn jáne eki qola — barlyǵy alty medal bar.
Búgin qazaqstandyq sportshylar basqa sport túrlerinen de jarysty jalǵastyrdy. Áielder quramasy sý dobynan alǵashqy kezdesýinde Singapýrdy 12:7 esebimen jeńdi.
Aiti–Nagoiadaǵy XX jazǵy Aziia oiyndary 19 qyrkúiek pen 4 qazan aralyǵynda ótedi.
