Қазақстанда базалық мөлшерлеменің төмендеуінен кейін екінші деңгейлі банктер депозиттердің шарттарын қайта қарай бастады. Салымдар бойынша сыйақы мөлшерлемесін төмендететінін алғашқылардың бірі болып Home Credit Bank пен Freedom Bank Kazakhstan жариялады, деп хабарлайды dalanews.kz.
Home Credit Bank 1 тамыздан бастап бірқатар депозиттер мен депозиттік сертификаттар бойынша сыйақы мөлшерлемесін азайтатынын хабарлады.
Атап айтқанда, үш айлық «Сберегательный Хоум+» депозиті және VIP клиенттерге арналған алты айлық «Сберегательный Хоум+» салымы бойынша номиналды мөлшерлеме 18,65%-дан 18,24%-ға төмендейді. Ал жылдық тиімді сыйақы мөлшерлемесі (ЖТСМ) 20,50%-дан 20,00%-ға дейін азаяды.
Сонымен қатар банк «Стандартный 2.0» депозиттік сертификаттарының да табыстылығын қысқартады. 12 айлық сертификат бойынша мөлшерлеме 19,5%-дан 19,0%-ға, ал екі жылдық сертификат бойынша 18,75%-дан 18,25%-ға төмендейді. Барлық жағдайда төмендеу көлемі 0,5 пайыздық тармақты құрайды. Қалған шарттар өзгеріссіз қалады.
Депозиттер шартын өзгертетінін Freedom Bank Kazakhstan та мәлімдеді.
6 тамыздан бастап жаңадан ашылатын және мерзімі ұзартылатын үш айлық «Стратегия» депозиті бойынша номиналды мөлшерлеме 18,09%, ал ЖТСМ 19,50% болады.
Ал 7 тамыздан бастап «Капитал» депозитінің шарттары өзгереді. Бір айлық салым бойынша номиналды мөлшерлеме 16,95%, ал ЖТСМ 18,00% деңгейінде белгіленеді.
Бұған дейін Altyn Bank та депозиттер бойынша сыйақы мөлшерлемесі төмендейтінін хабарлаған болатын, алайда нақты көрсеткіштерді жарияламаған.
Банктердің мұндай шешімі Ұлттық банктің ақша-кредит саясатын жұмсартуынан кейін қабылданды. 24 шілдеде реттеуші базалық мөлшерлемені 17%-дан 16,75%-ға дейін төмендетті. Бұл маусым айындағы шешімнен кейінгі қатарынан екінші төмендеу болды. Маусымда базалық мөлшерлеме ұзақ уақыттан бері алғаш рет бірден 1 пайыздық тармаққа қысқартылып, 17% деңгейіне түскен еді.
Ұлттық банк бұл шешімді инфляцияның баяулауымен түсіндірді. Маусым айында жылдық инфляция 10,3%-ды құрап, мамырдағы 10,4%-дан төмендеді. Осылайша баға өсімінің бәсеңдеуі тоғызыншы ай қатарынан жалғасып отыр.
Сонымен бірге реттеуші алдағы шешімдер инфляцияның өзгерісіне, тұтынушылық сұранысқа және бюджеттік саясаттың орындалуына байланысты қабылданатынын атап өтті.
Базалық мөлшерлеме төмендегенімен, экономикадағы ақша-кредит шарттары әлі де қатаң күйінде қалып отыр. Қазақстан қаржыгерлері қауымдастығының (ҚҚҚ) сарапшыларының мәліметінше, биылғы алғашқы жартыжылдықта нақты пайыздық мөлшерлеме 5,7%-дан 6,7%-ға дейін өскен. Бұған инфляцияның пайыздық мөлшерлемеден жылдамырақ баяулауы себеп болған.
Қауымдастық дерегіне сәйкес, бұл үрдіс экономикада да байқала бастады. Қаңтар–мамыр айларында бөлшек сауда өсімі өткен жылдың осы кезеңіндегі 6,5%-дан 3,6%-ға дейін баяулаған. Ал тұтынушылық несиелер беру көлемі былтырғы сәйкес кезеңдегі 17,8% өсімнен кейін биыл 8%-ға қысқарған.
Сарапшылардың пікірінше, жылдың алғашқы жартысында депозиттік нарықта қорландыру құны айтарлықтай өзгермеген, бұл мөлшерлемелердің бұрынғы белсенді өсімінен кейін тұрақтанғанын көрсетеді. Ал банктердің тамыз айынан бастап депозиттердің табыстылығын төмендетуі – Ұлттық банктің шілдедегі шешімінің бөлшек клиенттерге әсер еткен алғашқы айқын белгісі болуы мүмкін.
