Parijde Frantsiiadaǵy Qazaqstan mádenieti kúnderi aiasynda QR Mádeniet jáne aqparat ministri Arman Qyryqbaev Frantsýz Respýblikasynyń Mádeniet ministri Katrin Pegarmen kezdesti, dep habarlaidy dalanews.kz.
Kezdesýde mádeni yntymaqtastyqty odan ári damytýdyń basym baǵyttary talqylandy. Arman Qyryqbaev Qazaqstan men Frantsiia arasyndaǵy mádeni bailanystardyń qarqyndy damyp kele jatqanyn aitty. Onyń sózinshe, ekijaqty qarym-qatynastyń joǵary deńgeige kóterilýine jáne ózara bailanystardyń júieli sipat alýyna Qazaqstan men Frantsiia prezidentteriniń dostyq pen senimge negizdelgen qarym-qatynasy airyqsha yqpal etip otyr.
Ministr eki eldiń mádeniet mekemeleri arasyndaǵy bailanysty keńeitýge jan-jaqty qoldaý kórsetýge daiyn ekenin bildirdi. Qazaqstan men Frantsiianyń óner ujymdary arasynda ózara gastrolder uiymdastyrý máselesine erekshe mán berildi.
Katrin Pegar birlesken jobalardy júzege asyrýǵa múddeli ekenin jetkizdi. Sondai-aq eki el mamandaryna arnalǵan oqý baǵdarlamalaryn, taǵylymdamalar men ózara sheberlik sabaqtaryn uiymdastyrý máseleleri sóz boldy.
Frantsiiaǵa jumys sapary barysynda Arman Qyryqbaev Lývr mýzeiiniń prezidenti Kristof Leribomen de kezdesti. Taraptar Lývr qoryndaǵy jádigerler kórmesin Qazaqstanda uiymdastyrý múmkindigin jáne mýzei salasyndaǵy ózge de birlesken jobalardy júzege asyrý joldaryn talqylady.
Frantsiiadaǵy Qazaqstan mádenieti kúnderiniń baǵdarlamasy aiasynda Qazaqstan kinosy kúnderi jáne Branli jaǵalaýyndaǵy Jak Shirak mýzeiinde «Qazaqstan – Frantsiia: mádeni dialogtan birlesken jobalarǵa» atty dóńgelek ústel ótti. Mádeniet kúnderdiń basty oqiǵasy – Parijdegi «Marini» teatrynda uiymdastyrylǵan Qazaqstan óner sheberleriniń gala-kontserti.
Kontserttiń ashylýynda Arman Qyryqbaev Qazaqstan men Frantsiia arasyndaǵy qarym-qatynastyń turaqty damyp kele jatqanyn jáne eki halyqty jaqyndastyrýdaǵy mádeniettiń airyqsha rólin atap ótti.
«Búginde Qazaqstan men Frantsiia arasyndaǵy qarym-qatynas nyǵaitylǵan strategiialyq áriptestik rýhynda qarqyndy damyp keledi. Qazaqstan Respýblikasynyń Prezidenti Qasym-Jomart Toqaevtyń 2024 jyly Frantsiiaǵa jasaǵan memlekettik sapary jáne Frantsiia Prezidenti Emmaniýel Makronnyń 2023 jyly Qazaqstanǵa sapary ekijaqty yntymaqtastyqqa tyń serpin berdi. Búgingi gala-kontsert halyqtarymyz arasyndaǵy dostyqty nyǵaitýǵa úles qosatyn taǵy bir mańyzdy qadam bolaryna senimdimin», – dedi ministr.
Gala-kontsert frantsýz kórermenine qazaq mýzykasy men horeografiia óneriniń bailyǵy men san qyrlylyǵyn tanytty. Sahnada qazaqtyń dástúrli ánderi men kúileri, sondai-aq zamanaýi týyndylar oryndaldy.
Kontsertte Álisher Kárimov, Zarina Altynbaeva, Ernar Sadyrbai (Amre), Eldar Saparaev, Rasýl Jarmaǵambetov, Farhat Kýbiev, Nazym Saǵyntai, «Astana Balet» teatry, HasSak etnofolklorlyq ansambli jáne Mezzo toby óner kórsetti. Ónerpazdardy Qurmanǵazy atyndaǵy Qazaq ulttyq halyq aspaptar orkestri súiemeldedi.
