2026 jylǵy 7 qyrkúiekten bastap Biryńǵai jinaqtaýshy zeinetaqy qorynyń (BJZQ) salymshylary mindetti jáne mindetti kásiptik zeinetaqy jarnalary esebinen qalyptasqan jinaqtarynyń 100%-yna deiin jeke basqarýshy kompaniialarǵa senip tapsyra alady, dep habarlaidy dalanews.kz.
Buǵan deiin erikti zeinetaqy jinaqtaryn tolyq kólemde basqarýǵa berý múmkindigi bolǵan. Endi bul múmkindik mindetti jáne mindetti kásiptik jarnalardan jinalǵan qarajatqa da keńeitildi.
Jinaqty birneshe kompaniia arasynda bólýge bolady
Salymshylar óz qarajatyn birneshe basqarýshy kompaniia men túrli investitsiialyq portfelder arasynda bóle alady. Árbir basqarýshy kompaniia úsh túrli investitsiialyq portfel usyna alady:
- konservativti;
- qalypty;
- táýekeli joǵary.
Olardyń aiyrmashylyǵy investitsiialaý quraldaryna, táýekel deńgeiine jáne investitsiia merzimine bailanysty bolady. Naqty usynystar ár kompaniianyń investitsiialyq strategiiasyna qarai anyqtalady.
Ótinish qalai beriledi?
Zeinetaqy jinaqtaryn basqarýǵa berý úshin salymshy ruqsat etilgen basqarýshy kompaniialardyń birin tańdap, BJZQ saityndaǵy jeke kabinet arqyly elektrondyq tsifrlyq qoltańbamen (ETsQ) ótinish bere alady. Sondai-aq jeke basyn kýálandyratyn qujatpen qor bólimshesine júginýge múmkindik bar. Qarajatty aýdarý rásimi 30 kúntizbelik kúnge deiin sozylýy múmkin. Ótinishtiń oryndalý mártebesin BJZQ saity men mobildi qosymshasy arqyly baqylaýǵa bolady.
Basqarýshy kompaniiany aýystyrý nemese jinaqtardy qaitadan Ulttyq banktiń basqarýyna qaitarý tek qarajat berilgen kúnnen bastap bir jyldan keiin ǵana múmkin bolady. Bul rette qarajat BJZQ-daǵy jeke zeinetaqy shotynda eseptelýin jalǵastyrady.
Basqarýshy kompaniialardyń tabysy qandai?
2025 jyldyń qorytyndysy boiynsha Ulttyq banktiń basqarýyndaǵy zeinetaqy aktivteriniń tabystylyǵy 7,43 paiyzdy qurady.
Jekemenshik basqarýshy kompaniialardyń kórsetkishteri mynadai boldy:
- «Sentras Sekiýritiz» – 14,66%;
- Alatau City Invest – 11,22%;
- BCC Invest – 9,93%;
- Halyk Global Markets – 9,45%;
- Halyk Finance – 8,32%.
Soǵan qaramastan, jeke basqarýshy kompaniialardyń zeinetaqy naryǵyndaǵy úlesi ázirge tómen deńgeide qalyp otyr. 2026 jylǵy 1 maýsymdaǵy jaǵdai boiynsha olardyń basqarýyndaǵy aktivter kólemi 109,98 mlrd teńgeni quraǵan. Al Qazaqstandaǵy barlyq zeinetaqy aktivteriniń jalpy kólemi 27,63 trln teńgege jetken. Bul jalpy kólemniń shamamen 0,4 paiyzyna teń.
