Qazaqstan azamattarynyń jeke málimetteri taralǵany jóninde aqparat taraǵan soń, atalǵan fakti boıynsha QR Qylmystyq kodeksiniń 147-baby boıynsha qylmystyq is qozǵaldy. Bul týraly bas prokýratýra KazTAG redaksıasyna rastady, dep habarlaıdy Dalanews.kz.
“Qazaqstandyqtardyń jeke derekteriniń taraýyna baılanysty Qylmystyq kodekstiń 147-baby aıasynda is tirkeldi. Tergeý isi İshki ister mınıstrligine tapsyryldy”, – dep málim etti Bas prokýratýra.
Buǵan deıin
Aıta keteıik, 17 maýsym kúni Sıfrlyq damý, ınovasıalar jáne aeroǵarysh ónerkásibi mınıstrligi 16 mıllıon qazaqstandyqtyń jeke deregi tarady degen aqparatty tekserip jatqanyn habarlaǵan edi.
Bul kórsetkish el halqynyń basym bóligin qamtıdy. Tarap ketken derekterde turǵyndardyń tegi, aty, ákesiniń aty, jynysy, týǵan kúni, JSN, meken jaıy, telefon nómirleri (uıaly, úı jáne jumys telefondary), azamattyǵy, ulty jáne basqa málimetter kezdesedi.
Mamandardyń aıtýynsha, bul derekter qalaı taralǵany ázirge belgisiz. Buryn jarıalanǵan málimetterdi jınaqtaý arqyly paıda bolýy nemese bul múlde jańa oqıǵa bolýy múmkin. Keıbir derekter jabyq Telegram arnalar arqyly satylyp ketýi de ǵajap emes.
Al mınıstrlik málimetinshe, azamattardyń jeke derekteri tarap ketkeni týraly aqparat tekserilip jatyr.
"Barlyq beıindi vedomstvo men qyzmetter jumyldyryldy. Jan-jaqty tekseris júrgizilip, sonyń ishinde derekterdiń ózektiligi tekserilip jatyr. Bastapqy taldaý jumystary derekterdiń kópshiligi eskirgenin kórsetti", - dedi mınıstrlik ókili.
Mınıstrlik málimdemesi
Keıin Sıfrlyq damý, ınovasıalar jáne aeroǵarysh ónerkásibi mınıstrligi qazaqstandyqtardyń jeke deregi tarap ketse, eGov-tan habarlama keletinin jetkizdi.
"Alǵashqy taldaý jumystary bul derekter memlekettik emes, jekemenshik júıelerden alynýy múmkin ekenin kórsetip otyr. Memlekettik júıelerden jeke derekter taraǵan joq, hakerlik shabýyldar saldarynan aqaý da tirkelgen joq", - dedi mınıstrlik ókilderi.
Vedomstvo málimetinshe, tekseris tolyq aıaqtalǵanǵa deıin qandaı da bir qorytyndy jasaýǵa erte.
"Azamattyń jeke derekteri tarap ketken málimetter arasynda bolsa, bul týraly elektron úkimet portaly (eGov) arqyly jeke kabınetine habarlama joldanady", - dep jazylǵan málimette.
