Endi qazaqstandyqtardyń Eýropaǵa barýy qıyndaıdy, dep habarlaıdy Dalanews.kz.
Qandaı ózgeris bolady?
12 qazannan bastap Shengen aımaǵyna kiretin elder jańa sıfrlyq shekara baqylaý júıesin, ıaǵnı Entry/Exit System-di (EES) engize bastaıdy. Bul júıe tólqujattaǵy dástúrli mórdi aýystyryp, elge kirý jáne shyǵý týraly málimetterdi elektron túrde tirkeıdi.
Eýropalyq komısıa málimetinshe, bul ózgerister qaýipsizdikti arttyrý, zańsyz kóshi-qonmen kúresý jáne sheteldikterdiń Shengen aımaǵynda bolý merzimin baqylaýdy jeńildetý maqsatynda engizilip otyr.
Eýroodaqtyń málimetinshe, jańa júıe mynadaı múmkindikter beredi:
-
Shengen aımaǵynda bolýdyń ruqsat etilgen merzimin dál esepteý;
-
Shekaralyq baqylaýdan ótýdi birtindep jedeldetý;
-
Jalǵan qujattardy paıdalaný men jeke derekterdiń urlaný qaýpin azaıtý;
-
Qaýipsizdik deńgeıin arttyrý jáne terorızm men aýyr qylmystarǵa qarsy kúresti jeńildetý.
Bul júıe qalaı jumys isteıdi?
Shekarany alǵash ret kesip ótken kezde saıahatshylarǵa tirkeýden ótý qajet bolady: tólqujat derekterin usyný qajet, bıometrıalyq málimetter tapsyrý kerek: sýret pen saýsaq izderi alynady. Bul derekter úsh jyl boıy saqtalady. Kelesi saparlarda tek bıometrıany sáıkestendirý jetkilikti, qaıtadan tolyq rásimnen ótýdiń qajeti joq.
Qosymsha qujattar rásimdeýdiń qajeti joq: jaramdy tólqujat pen shengen vızasy bolsa jetkilikti. Sapar aldynda aldyn ala tirkelý talap etilmeıdi. EES júıesine tirkeý shekarada tegin júrgiziledi. Eger saıahatshy bıometrıalyq derekter berýden bas tartsa, EO aýmaǵyna kirýge ruqsat berilmeıdi.
Eýropalyq komısıanyń málimetinshe, barlyq aqparat ulttyq organdar men EO-nyń iri IT-júıelerin basqaratyn eu-LISA agenttiginiń baqylaýynda saqtalady. Derekterge qoljetimdilik shekteýli jáne olar GDPR standarttaryna saı qorǵalǵan.
EES júıesi qaı elderde jumys isteıdi?
Entry/Exit System (EES) Shengen aımaǵyna kiretin 25 EO eli men oǵan múshe emes, biraq Shengenge kiretin 4 elde qoldanylady.
Tolyq tizim mynadaı: Avstrıa, Belgıa, Bolgarıa, Vengrıa, Germanıa, Grekıa, Danıa, Islandıa, Ispanıa, Italıa, Latvıa, Lıhtenshteın, Lıtva, Lúksembýrg, Malta, Nıderland, Norvegıa, Polsha, Portýgalıa, Rýmynıa, Slovakıa, Slovenıa, Fınlándıa, Fransıa, Shvesıa, Shveısarıa, Horvatıa, Chehıa jáne Estonıa.
Kimderge qatysty?
Jańa erejeler EO-ǵa kirmeıtin elderdiń azamattaryna, sonyń ishinde Qazaqstan azamattaryna da qoldanylady.
