Qazaqstandyq oqýshyǵa jiyrmadan astam ýniversitet esigin ashty, dep habarlaidy Dalanews.kz.
Belgili sarapshy Aibar Oljaevtyń uly Daniiar Oljaev SAT halyqaralyq emtihanynan 1570 bal jinap, álemniń kez-kelgen oqý ornyna esik ashty. Bul test boiynsha maksimaldy 1600 ball jinaýǵa bolady.
"IELTS-tan 8.0 deńgeiin onyń aldynda alyp qoiǵan edi. Robototehnikadan VEX álem chempionatynda Qazaqstan rekordyn jańartqany, sonymen birge Eýropa chempiony ekeni taǵy bar", - deidi Aibar Oljaev.
Aibar Oljaevtyń sózinshe, qazaq tarihynda SAT-tan 1570 baldan joǵary alǵan adam óte sirek.
"Jalpy álemde tapsyrýshylardyń tek 2 paiyzy ǵana bul mejege jetedi eken. Endi jiyrmadan astam ýniver esigin ashty. Ózi tańdap alady", - deidi Aibar Oljaev.
Aita keteiik, Daniiar Almaty-Naýryzbai Ziiatkerlik mektebiniń 12-synyp oqýshysy.
"Bul kórsetkish– tabandylyqtyń, júieli eńbektiń jáne maqsatqa baǵyttalǵan daiyndyqtyń nátijesi. Daniiardyń aitýynsha, daiyndyqqa bir jyldan astam ýaqyt ketken. Úlken septigin mekteptegi daiyndyq sabaqtary men synaq testileri atqardy. Olar óz kúshine senimdiligin arttyryp strategiia qalyptastyrýǵa kómektesti", - deidi mektep ókilderi.
Qazir Daniiar óz tájiribesimen jáne emtihanǵa daiyndyq laifhaktarymen mekteptiń 9–11-synyp oqýshylarymen bólisýdi josparlap otyr.
"Eń basty keńesim – daiyndyqty erte bastap, kúninde jarty saǵat bólý kerek. Turaqtylyq pen óz-ózińe senim – tabystyń kilti", – deidi bolashaq túlek.
