Qazaqstandyq kásipkerler qosymsha qun salyǵynyń kóterilýine qarsy shyqty, dep habarlaidy Dalanews.kz.
Úkimettiń QQS mólsherin kóterý týraly sheshiminen keiin, “Atameken” ulttyq kásipkerler palatasy shuǵyl keńeitilgen otyrys ótkizdi.
Jiynǵa elimizdiń ár óńirinen 800-ge jýyq kásipker qatysty. “Atameken” tóraǵasy Raiymbek Batalovtyń aitýynsha, kásipkerler QQS ósimine alańdaýly, sondai-aq jańa Salyq kodeksine qatysty óz usynystaryn bildirgen.
Batalovtyń sózinshe, qazir biznes pen bilik arasynda konstrýktivti, biraq kúrdeli dialog júrip jatyr. Ulttyq palata salyq júiesin jeńildetý qajet dep sanaidy jáne kásipkerler úshin teń jaǵdaidyń saqtalýyn talap etedi.
“Qazir biznes-qaýymdastyqta keńinen talqylanyp jatqan mańyzdy másele – QQS mólsherlemesi. Biz onyń kóterilýi naqty esepteýlermen negizdelýi kerek dep sanaimyz jáne mólsherlemeniń birden 20%-ǵa ulǵaiýyna qarsymyz. Sonymen qatar, QQS shegin qaita qarastyrý qajet. Biz 15 million teńge shegine de qarsymyz! Munyń biznes tabysyna jáne damý qarqynyna, ásirese salyqtyq ákimshilendirýdiń kúrdelenýine qalai áser etetinin jan-jaqty zertteý mańyzdy”, – dedi Batalov.
Sonymen qatar, “Atameken” arnaiy salyq rejimin qoldaný shegin tómendetý usynysyn da quptamaidy.
“Biz úshin mundai sheshimder naqty sandar men taldaý nátijelerine negizdelýi qajet”, – dedi ulttyq palata ókilderi.
“Atameken” salyq reformasyna qatysty usynystar qamtylǵan biýlleten ázirledi.
Aita keteiik, QQS mólsherlemesin 20%-ǵa deiin kóterý jáne onyń shegin 15 million teńgege deiin tómendetý bastamasy alǵash ret 28 qańtarda ótken Úkimettiń keńeitilgen otyrysynda kóterilgen bolatyn.
