قازاقستاندىق كاسىپكەرلەر قوسىمشا قۇن سالىعىنىڭ كوتەرىلۋىنە قارسى شىقتى، دەپ حابارلايدى Dalanews.kz.
ۇكىمەتتىڭ ققس مولشەرىن كوتەرۋ تۋرالى شەشىمىنەن كەيىن، “اتامەكەن” ۇلتتىق كاسىپكەرلەر پالاتاسى شۇعىل كەڭەيتىلگەن وتىرىس وتكىزدى.
جيىنعا ەلىمىزدىڭ ءار وڭىرىنەن 800-گە جۋىق كاسىپكەر قاتىستى. “اتامەكەن” ءتوراعاسى رايىمبەك باتالوۆتىڭ ايتۋىنشا، كاسىپكەرلەر ققس وسىمىنە الاڭداۋلى، سونداي-اق جاڭا سالىق كودەكسىنە قاتىستى ءوز ۇسىنىستارىن بىلدىرگەن.
باتالوۆتىڭ سوزىنشە، ءقازىر بيزنەس پەن بيلىك اراسىندا كونسترۋكتيۆتى، ءبىراق كۇردەلى ديالوگ ءجۇرىپ جاتىر. ۇلتتىق پالاتا سالىق جۇيەسىن جەڭىلدەتۋ قاجەت دەپ سانايدى جانە كاسىپكەرلەر ءۇشىن تەڭ جاعدايدىڭ ساقتالۋىن تالاپ ەتەدى.
“ءقازىر بيزنەس-قاۋىمداستىقتا كەڭىنەن تالقىلانىپ جاتقان ماڭىزدى ماسەلە – ققس مولشەرلەمەسى. ءبىز ونىڭ كوتەرىلۋى ناقتى ەسەپتەۋلەرمەن نەگىزدەلۋى كەرەك دەپ سانايمىز جانە مولشەرلەمەنىڭ بىردەن 20%-عا ۇلعايۋىنا قارسىمىز. سونىمەن قاتار، ققس شەگىن قايتا قاراستىرۋ قاجەت. ءبىز 15 ميلليون تەڭگە شەگىنە دە قارسىمىز! مۇنىڭ بيزنەس تابىسىنا جانە دامۋ قارقىنىنا، اسىرەسە سالىقتىق اكىمشىلەندىرۋدىڭ كۇردەلەنۋىنە قالاي اسەر ەتەتىنىن جان-جاقتى زەرتتەۋ ماڭىزدى”، – دەدى باتالوۆ.
سونىمەن قاتار، “اتامەكەن” ارنايى سالىق رەجيمىن قولدانۋ شەگىن تومەندەتۋ ۇسىنىسىن دا قۇپتامايدى.
“ءبىز ءۇشىن مۇنداي شەشىمدەر ناقتى ساندار مەن تالداۋ ناتيجەلەرىنە نەگىزدەلۋى قاجەت”، – دەدى ۇلتتىق پالاتا وكىلدەرى.
“اتامەكەن” سالىق رەفورماسىنا قاتىستى ۇسىنىستار قامتىلعان بيۋللەتەن ازىرلەدى.
ايتا كەتەيىك، ققس مولشەرلەمەسىن 20%-عا دەيىن كوتەرۋ جانە ونىڭ شەگىن 15 ميلليون تەڭگەگە دەيىن تومەندەتۋ باستاماسى العاش رەت 28 قاڭتاردا وتكەن ۇكىمەتتىڭ كەڭەيتىلگەن وتىرىسىندا كوتەرىلگەن بولاتىن.
