Almaty qalalyq politsiia departamenti áleýmettik jelilerdi baqylaý barysynda Daricorn esimdi blogerdiń jol qozǵalysy erejelerin óreskel buzǵanyn anyqtady, dep habarlaidy Dalanews.kz.
“Jol qozǵalysy erejelerin ádeii ári menmensi buzǵan qyz-kelinshek eshqandai burylys signalysyz jolaq aýystyryp, apatty jaǵdai týyndatqan. Tekserý nátijesinde atalǵan azamatsha Ákimshilik quqyq buzýshylyq týraly kodekstiń 595-baby 1-bóligi (burylys nemese jolaq aýystyrý kezinde signal bermeý) jáne 606-baby 1-bóligi (apatty jaǵdai jasaý) boiynsha ákimshilik jaýapkershilikke tartyldy,” — delingen habarlamada.
Esepke sáikes, blogerge salynǵan jalpy aiyppul somasy – 58 980 teńge.
Politsiia departamenti Daricorn-nyń bul áreketin ádeii jasalǵan, ainalasyndaǵylardyń ómiri men qaýipsizdigine tikelei qater tóndirgen qadam dep baǵalady.
“Eń soraqysy — osyndai qaýipti is-árekettiń bári internettegi laik pen qaralym úshin jasalady,” — dep qynjyldy quqyq qorǵaýshylar.
Politsiia ókilderi qoǵamda tanymal bolý, jazylýshylar sany men jariialylyq deńgeii zań aldyndaǵy jaýapkershilikten bosatpaitynyn kesip aitty.
“Zań — bárine ortaq. Jaza — bultartpas. Árbir zań buzýshylyq beinejazbasy – quqyqtyq jaýaptyń bastamasy. "Bári ruqsat" degen jalǵan túsinikpen haip qýǵan áreketter qatty synǵa alynyp, tiisti jazasyn alady,” — dep eskertti Almaty politsiiasy.
Aita keteiik, Daricorn buǵan deiin de synǵa ilikken edi. Onyń paraqshasynda jariialanǵan videoda bir balanyń ata-anasynyń ruqsatynsyz beinesi kórsetilgen. Keiin anasy bul jaǵdai balasyna kiberbýllingke ushyraýyna sebep boldy dep, Balalar quqyqtaryn qorǵaý komitetine aryzdanǵan bolatyn.
