الماتى قالالىق پوليسيا دەپارتامەنتى الەۋمەتتىك جەلىلەردى باقىلاۋ بارىسىندا Daricorn ەسىمدى بلوگەردىڭ جول قوزعالىسى ەرەجەلەرىن ورەسكەل بۇزعانىن انىقتادى، دەپ حابارلايدى Dalanews.kz.

“جول قوزعالىسى ەرەجەلەرىن ادەيى ءارى مەنمەنسي بۇزعان قىز-كەلىنشەك ەشقانداي بۇرىلىس سيگنالىسىز جولاق اۋىستىرىپ، اپاتتى جاعداي تۋىنداتقان. تەكسەرۋ ناتيجەسىندە اتالعان ازاماتشا اكىمشىلىك قۇقىق بۇزۋشىلىق تۋرالى كودەكستىڭ 595-بابى 1-بولىگى (بۇرىلىس نەمەسە جولاق اۋىستىرۋ كەزىندە سيگنال بەرمەۋ) جانە 606-بابى 1-بولىگى (اپاتتى جاعداي جاساۋ) بويىنشا اكىمشىلىك جاۋاپكەرشىلىككە تارتىلدى،” — دەلىنگەن حابارلامادا.

ەسەپكە سايكەس، بلوگەرگە سالىنعان جالپى ايىپپۇل سوماسى – 58 980 تەڭگە.

پوليسيا دەپارتامەنتى Daricorn-نىڭ بۇل ارەكەتىن ادەيى جاسالعان، اينالاسىنداعىلاردىڭ ءومىرى مەن قاۋىپسىزدىگىنە تىكەلەي قاتەر توندىرگەن قادام دەپ باعالادى.

“ەڭ سوراقىسى — وسىنداي ءقاۋىپتى ىس-ارەكەتتىڭ ءبارى ينتەرنەتتەگى لايك پەن قارالىم ءۇشىن جاسالادى،” — دەپ قىنجىلدى قۇقىق قورعاۋشىلار.

پوليسيا وكىلدەرى قوعامدا تانىمال بولۋ، جازىلۋشىلار سانى مەن جاريالىلىق دەڭگەيى زاڭ الدىنداعى جاۋاپكەرشىلىكتەن بوساتپايتىنىن كەسىپ ايتتى. 

“زاڭ — بارىنە ورتاق. جازا — بۇلتارتپاس. ءاربىر زاڭ بۇزۋشىلىق بەينەجازباسى – قۇقىقتىق جاۋاپتىڭ باستاماسى. "ءبارى رۇقسات" دەگەن جالعان تۇسىنىكپەن حايپ قۋعان ارەكەتتەر قاتتى سىنعا الىنىپ، ءتيىستى جازاسىن الادى،” — دەپ ەسكەرتتى الماتى پوليسياسى.

ايتا كەتەيىك، Daricorn بۇعان دەيىن دە سىنعا ىلىككەن ەدى. ونىڭ پاراقشاسىندا جاريالانعان ۆيدەودا ءبىر بالانىڭ اتا-اناسىنىڭ رۇقساتىنسىز بەينەسى كورسەتىلگەن. كەيىن اناسى بۇل جاعداي بالاسىنا كيبەربۋللينگكە ۇشىراۋىنا سەبەپ بولدى دەپ، بالالار قۇقىقتارىن قورعاۋ كوميتەتىنە ارىزدانعان بولاتىن.