2025 jyldyń 1 shildesindegi jaǵdai boiynsha Qazaqstannyń bank sektorynda 22 ekinshi deńgeili bank, onyń 14-i sheteldikterdiń qatysýymen jumys isteýde, onda da 10-y enshiles bolyp tabylady, dep jazady Dalanews.kz Ranking.kz portalyna silteme jasap.
ForteBank elimizdiń iri EDB arasynda menshikti kapitalynyń ósimi boiynsha kósh bastap tur: + 4,2% (nemese + 19 mlrd teńge). Birinshi jartyjyldyqtyń qorytyndysy boiynsha bul kórsetkish 472,1 mlrd teńgege jetken. Ekinshi orynda Freedom Bank: + 3,9% - ǵa (nemese 7,3 mlrd teńgege), 197,4 mlrd teńgege deiin ósim boldy. Úzdik úshtikti Halyk Bank túiindeidi: + 3,7%, 3,2 trln teńgege deiin. Óz kapitalynyń ósimi boiynsha EDB-niń alǵashqy bestigine Otbasy Banki men Home CREDIT Bank te kiredi.
Menshikti kapital - bankterdiń senimdiligi men turaqtylyǵynyń negizgi kórsetkishteriniń biri. Ol qarjy uiymdarynyń syrtqy kúizelisterge tótep berý, ótimdilikti saqtaý jáne salymshylardyń múddelerin qorǵaýdy qamtamasyz etý qabiletin baǵalaýda mańyzdy ról atqarady.
Kapital ósimi bankterdiń ekonomikany nesieleý, operatsiialar spektrin keńeitý jáne turaqty damý qabiletiniń artqanyn kórsetedi. Retteýshi organ úshin bul sektordyń qarjylyq turaqtylyq pen jetilýge qarai jyljýyn tanytady.
Uzaq merzimdi dinamikada Qazaqstandaǵy ekinshi deńgeili bankterdiń menshikti kapitaly senimdi ósimdi tanytýdy jalǵastyrýda: sońǵy jyly ol 21,7%- ǵa, al sońǵy bes jylda eki eseden astamǵa ósti.
QNRDA málimetteri boiynsha, 2025 jyldyń shildesinde bank sektory menshikti kapitaldyń aitarlyqtai qoryna ie. Negizgi kapitaldyń jetkiliktilik koeffitsienti (k1) 19,5%, menshikti kapitaldyń jetkiliktilik koeffitsienti (k2) 21,0% quraidy. Bul kórsetkishter zańnamada belgilengen normativterden edáýir asyp túsedi, bul bankterge áleýetti táýekelderdi tiimdi jabýǵa jáne naryqtyq qubylmalylyq jaǵdaiynda turaqtylyqty saqtaýǵa múmkindik beredi.
Buǵan deiin saitymyzda Qarjy naryǵyn retteý jáne damytý agenttigi qadaǵalap stress-testileý (QST) nátijeleri boiynsha alǵash ret bankter kapitalynyń jetkiliktiligine býferlerdi qoldanǵanyn jazǵanbyz. Sondai-aq bizden "Qarjyger-maman dabyl qaqty: Bankter rahatqa bólenýde, eldegi kapital toqtaýsyz syrtqa aǵylýda" degen maqalany da oqi otyryńyzdar.
