Qazaqstan aýmaǵynda salynýy múmkin atom elektr stansıasy úshin Reseı men Qytaı arasyndaǵy básekelestik údeı tústi. Eki alpaýyt el óz tehnologıalaryn usynyp, tartymdy sharttarmen kelisimge kelýge tyrysyp jatyr, dep habarlaıdy Dalanews.kz.
Qytaıdyń jetekshi aqparat quraldarynyń málimetinshe, Qytaıdyń Ulttyq ıadrolyq energetıka korporasıasy (CNNC) Qazaqstanǵa jalpy qýaty 2,4 gıgavatt bolatyn eki HPR-1000 úlgisindegi reaktordy bar-joǵy 550 mıllıon AQSH dollaryna salyp berýge ázir ekenin málimdegen. Bul — halyqaralyq tájirıbege shaqqanda, asa tómen baǵa.
Salystyrý úshin, dál osyndaı qýattaǵy jobaǵa Reseılik "Rosatom" kompanıasy 1,2–1,5 mıllıard dollar surap otyr. Iaǵnı qytaılyq usynys baǵasy eki esege jýyq arzan.
Qytaılyq Hualong One tehnologıasy — óz eliniń ınjenerlik jetistigine aınalǵan, úshinshi býyndaǵy zamanaýı ıadrolyq reaktor. Bul júıe tek Pákistan men Argentına tarapynan ǵana emes, ózge de memleketterdiń qyzyǵýshylyǵyn týdyryp otyr. Sarapshylardyń aıtýynsha, HPR-1000 modeli qaýipsizdik deńgeıi joǵary bolýymen erekshelenedi. Ol zilzala men sýnamı sekildi tabıǵı apattarǵa da tótep bere alady. Osy sebepti ony "ıadrolyq energetıkadaǵy tank" dep ataýshylar bar.
Eń qyzyǵy — Qytaı tarapy tek reaktorlarmen shektelmeı, Qazaqstandaǵy ıadrolyq otyn sıkly men ǵylymı-zertteý ınfraqurylymyn damytýǵa jan-jaqty qoldaý kórsetýge ýáde bergen. Al Reseı tarapynan mundaı aýqymdy usynystar ázirge baıqala qoıǵan joq.
Qalaı bolǵanda da, sarapshylar Qytaıdyń ıadrolyq tehnologıa salasyndaǵy yqpaly kún sanap artyp kele jatqanyn atap ótedi. Qazaqstandaǵy bul jobada kimniń jeńiske jetetini belgisiz bolsa da, Qytaı ıadrolyq energetıkasynyń álemdik sahnaǵa nyq qadammen bet alǵany anyq.
