2026 jyldyń shilde aiynyń qorytyndysy boiynsha Qazaqstanda jyldyq infliatsiia 10,2%-dy qurap, aldyńǵy aimen salystyrǵanda tómendedi, dep habarlaidy Dalanews.kz
Ulttyq ekonomika ministrliginiń málimetinshe, shilde aiynda ailyq infliatsiia 0,6% boldy. Bul kórsetkish 2025 jáne 2024 jyldyń shilde ailaryndaǵy 0,7%-dan tómen.
Vedomstvonyń málimetinshe, jyldyq infliatsiianyń baiaýlaýyna Úkimettiń, Ulttyq banktiń jáne Qarjy naryǵyn retteý jáne damytý agenttiginiń baǵa ósimin tejeýge, makroekonomikalyq turaqtylyqty qamtamasyz etýge jáne halyqtyń ál-aýqatyn arttyrýǵa baǵyttalǵan sharalary áser etken.
Shilde aiynyń qorytyndysy boiynsha azyq-túlik taýarlarynyń jyldyq infliatsiiasy 10,1%-dy qurady. Al áleýmettik mańyzy bar azyq-túlik taýarlarynyń baǵasy bir jyl ishinde 2,4%-ǵa ósti. Byltyr bul kórsetkish 9,4% bolǵan.
Ministrlik muny áleýmettik mańyzy bar azyq-túlik taýarlarynyń tizimin 19-dan 31 ataýǵa deiin keńeitý, saýda ústemesiniń shekti 15% mólsheriniń saqtalýyn baqylaý, deldaldar sanyn qysqartý jáne ishki naryqty otandyq ónimmen qamtamasyz etý jónindegi sharalarmen bailanystyrady.
Sonymen birge ministrliktiń málimetinshe, janar-jaǵarmai naryǵyn kezeń-kezeńimen yryqtandyrý jáne kommýnaldyq qyzmetter tarifterin kóterýge qoiylǵan moratoriidiń aiaqtalýy infliatsiiaǵa qysym kórsetýdi jalǵastyryp otyr. Sonyń saldarynan azyq-túlikke jatpaityn taýarlardyń baǵasy shilde aiynda jyldyq eseppen 11,7%-ǵa ósti.
