Qazaqstanda aldaǵy eki jyl ishinde shamamen 3 trln teńge investitsiia tartylyp, 200-den astam jańa óndiris orny ashylady. Bul týraly Prezident Qasym-Jomart Toqaev Parlament palatalarynyń birlesken otyrysynda málimdedi, dep habarlaidy dalanews.kz.
Memleket basshysynyń aitýynsha, elimizde avtokólik, turmystyq tehnika, júk vagondary, qurylys materialdary jáne basqa da joǵary tehnologiialyq ónim shyǵaratyn zamanaýi kásiporyndar iske qosylyp jatyr.
«Tek 2023–2025 jyldar aralyǵynda jalpy quny 3,7 trillion teńgeni quraityn 540 indýstriialyq joba júzege asyryldy. Aldaǵy eki jylda shamamen úsh trillion teńge investitsiia tarta otyryp, taǵy 200-den astam jańa óndiristi iske qosý josparlanyp otyr. Bul biýdjet kirisiniń artýyna, ozyq tehnologiialardyń engizilýine jáne eń bastysy, jańa jumys oryndarynyń ashylýyna múmkindik beredi», – dedi Qasym-Jomart Toqaev.
Prezidenttiń aitýynsha, iske asyrylǵan indýstriialyq jobalardyń nátijesinde qazirdiń ózinde 50 myńǵa jýyq turaqty jumys orny qurylǵan. Al jańa kásiporyndar paidalanýǵa berilgennen keiin taǵy 20 myńnan astam adam turaqty jumyspen qamtylady.
Sonymen qatar Memleket basshysy shaǵyn jáne orta biznesti qoldaý jumystary jalǵasatynyn aitty.
«Memleket otandyq kásipkerlerdi qoldaý men qorǵaýǵa qomaqty qarajat bólip keledi. Búginde Qazaqstandaǵy eńbekke qabiletti azamattardyń shamamen jartysy shaǵyn jáne orta bizneste eńbek etedi. Sońǵy bes jylda bul salada jumys isteitinderdiń sany 4,5 million adamǵa jetti. Jalpy ishki ónimdegi shaǵyn jáne orta biznestiń úlesi alǵash ret 40 paiyzdan asty. Al 2025 jyly «Báiterek» holdingi arqyly kásipkerlerge segiz trillion teńge kóleminde qoldaý kórsetildi», – dedi Prezident.
