Qazaqstanda zańdar endi úsh kezeń arqyly qabyldanady, dep habarlaidy Dalanews.kz tilshisi. Bul týraly Memleket basshysy Qasym-Jomart Toqaev Ulttyq quryltaidyń V otyrysynda sóilegen sózinde málimdedi.
Prezidenttiń aitýynsha, Parlamentti reformalaýǵa qatysty usynystardyń tórtten biri zań shyǵarýshy organnyń jumys tártibi men rásimderine bailanysty bolǵan. Sondai-aq jańa Parlamentte depýtattardy bes jyl merzimge sailaý qarastyrylyp otyr.
«Zań qabyldaýdyń úsh satyly tártibi usynylady. Birinshi kezeńde depýtattar zań jobasyn tutastai maquldaidy. Odan keiin túzetýler maquldanady. Sońǵy kezeńde zań tolyq qabyldanady», – dedi Qasym-Jomart Toqaev.
Memleket basshysy bilik institýttarynyń jańartylǵan qurylymy barsha azamat úshin teń múmkindikterge negizdelgen ádiletti qoǵam qalyptastyrýdyń negizi bolatynyn atap ótti.
«Biz memlekettiń institýtsionaldyq irgetasyn nyǵaityp, “Kúshti Prezident – yqpaldy Parlament – esep beretin Úkimet” qaǵidatyna sai turaqty saiasi júie quramyz. Basty maqsatymyz – osy», – dedi prezident.
Qasym-Jomart Toqaevtyń aitýynsha, parlamenttik reforma eldiń áleýetin arttyrýǵa múmkindik beredi.
«Bul qadam áleýmettik-ekonomikalyq ózgeristerdiń qarqynyn kúsheitip, sapasyn jaqsartady. Memleket basshysy retinde men buǵan nyq senemin», – dep atap ótti ol.
Aita keteiik, Ulttyq quryltaidyń V otyrysy Qyzylorda qalasynda ótip jatyr. Memleket basshysy óz sózinde Qazaqstannyń aldaǵy damý baǵyttaryn aiqyndap, qoǵamdyq ómirge qatysty ózekti máselelerge toqtaldy.
