قازاقستاندا زاڭدار ەندى ءۇش كەزەڭ ارقىلى قابىلدانادى، دەپ حابارلايدى Dalanews.kz ءتىلشىسى. بۇل تۋرالى مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ V وتىرىسىندا سويلەگەن سوزىندە مالىمدەدى.
پرەزيدەنتتىڭ ايتۋىنشا، پارلامەنتتى رەفورمالاۋعا قاتىستى ۇسىنىستاردىڭ تورتتەن ءبىرى زاڭ شىعارۋشى ورگاننىڭ جۇمىس ءتارتىبى مەن راسىمدەرىنە بايلانىستى بولعان. سونداي-اق جاڭا پارلامەنتتە دەپۋتاتتاردى بەس جىل مەرزىمگە سايلاۋ قاراستىرىلىپ وتىر.
«زاڭ قابىلداۋدىڭ ءۇش ساتىلى ءتارتىبى ۇسىنىلادى. ءبىرىنشى كەزەڭدە دەپۋتاتتار زاڭ جوباسىن تۇتاستاي ماقۇلدايدى. ودان كەيىن تۇزەتۋلەر ماقۇلدانادى. سوڭعى كەزەڭدە زاڭ تولىق قابىلدانادى»، – دەدى قاسىم-جومارت توقايەۆ.
مەملەكەت باسشىسى بيلىك ينستيتۋتتارىنىڭ جاڭارتىلعان قۇرىلىمى بارشا ازامات ءۇشىن تەڭ مۇمكىندىكتەرگە نەگىزدەلگەن ادىلەتتى قوعام قالىپتاستىرۋدىڭ نەگىزى بولاتىنىن اتاپ ءوتتى.
«ءبىز مەملەكەتتىڭ ينستيتۋسيونالدىق ىرگەتاسىن نىعايتىپ، “كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت” قاعيداتىنا ساي تۇراقتى ساياسي جۇيە قۇرامىز. باستى ماقساتىمىز – وسى»، – دەدى پرەزيدەنت.
قاسىم-جومارت توقايەۆتىڭ ايتۋىنشا، پارلامەنتتىك رەفورما ەلدىڭ الەۋەتىن ارتتىرۋعا مۇمكىندىك بەرەدى.
«بۇل قادام الەۋمەتتىك-ەكونوميكالىق وزگەرىستەردىڭ قارقىنىن كۇشەيتىپ، ساپاسىن جاقسارتادى. مەملەكەت باسشىسى رەتىندە مەن بۇعان نىق سەنەمىن»، – دەپ اتاپ ءوتتى ول.
ايتا كەتەيىك، ۇلتتىق قۇرىلتايدىڭ V وتىرىسى قىزىلوردا قالاسىندا ءوتىپ جاتىر. مەملەكەت باسشىسى ءوز سوزىندە قازاقستاننىڭ الداعى دامۋ باعىتتارىن ايقىنداپ، قوعامدىق ومىرگە قاتىستى وزەكتى ماسەلەلەرگە توقتالدى.
